Қаржылық мониторинг агенттігі онлайн ойындарды жарнамалауға қатысы бар деген 34 блогерге қатысты тексеру жұмыстарын жүргізіп жатыр, олардың 11-і жауапқа тартылды. Ведомство блогерлердің есімін де жария етті, деп хабарлайды KAZ.NUR.KZ агенттіктің Telegram-дағы арнасына сілтеме жасап.

Қаржылық мониторинг агенттігі заңсыз ойын бизнесін тоқтату бойынша белсенді жұмыс жүргізіп жатқанын хабарлады.

Агенттік мәліметінше, соңғы екі жарым жылда 205 жасырын казино жабылып, олардың жұмысына қатысы бар 224 адам қылмыстық жауапкершілікке тартылды. Ел ішінде заңсыз гемблинг фактілері толық дерлік жойылды.

Алайда қазіргі таңда негізгі қауіп шетелде тіркелген онлайн-казинолардан туындап отыр. Олар еліміздің азаматтарын құмар ойынға тартып, оларды лудомания құрбанына айналдырып жатыр.

"Ойын бизнесі туралы" Заңға сәйкес Қазақстан аумағында олардың қызметіне толықтай тыйым салынған. Осыған орай жыл басынан бері 34 шетелдік онлайн-платформаға апаратын 17 мыңнан астам сілтеме бұғатталды.

Ведомство өкілдерін қазақстандық төлем ұйымдарының әрекеті ерекше алаңдатып отыр. Олар депозиттерді толықтыру мен қаражатты шешуді (кэшаут) қамтамасыз етеді дейді құзырлы орган өкілдері. Мұндай қаржылық "делдалдардың" бірқатары анықталған. Агенттік жақында олардың қызметіне құқықтық баға беретінін мәлімдеді.

Одан бөлек онлайн-казинолардың қолжетімділігі, верификацияның жоқтығы және төмен ставкалар олардан келетін қауіпті еселейді. Өскелең ұрпақ құмар ойынға тәуелділікке ұрынып, салдарынан ішімдік пен есірткіге әуестік сияқты басқа да жағымсыз құмарлықтарға бейім болып барады.

ҚМА өкілдерінің сөзінше, жаңа "клиенттерді" тарту үшін олардың иелері миллиондаған оқырманы бар отандық блогерлерді пайдаланады. Блогерлер оңай пайда табуды көздеп, қарапайым азаматтарды қаржылық тұзаққа түсіріп жатыр дейді құзырлы органдағылар.

Жыл басынан бері агенттік 34 блогердің онлайн-ойындарды жарнамалауға қатысы барын анықтаған.

"Олардың ішінде Қайсар Қамза, Шыңғысхан Көпбаев, Айтмаханов Тәуіржан, Тұрғанов Наиль, Диляра Аманқосқызы және басқалар бар", — делінген ҚМА баспасөз қызметі таратқан хабарламада.

ҚМА мәліметінше, 11 блогер әкімшілік жауапкершілікке тартылды, ал 23 контент жасаушыға қатысты материалдар Мәдениет министрлігіне шара қабылдау үшін жолданды.

"Көпшілігі заңды бір рет емес, жүйелі түрде бұзады. Мәселен хип-хоп орындаушы Baller (шын аты – Шыңғысхан Көпбаев) жыл басынан бері аталған бап бойынша бес рет жауапқа тартылды.

️600 мыңнан астам жазылушысы бар музыкант-блогер Ринат Шамшыраққа қатысты да онлайн-казино жарнамалағаны үшін әкімшілік іс қозғалған.

Блогер "Niko_nett" пен инфлюенсер Қайсар Қамза да ерекше назарда. Қайсар Қамза өзінің Telegram желісіндегі арнасында заңсыз ойындарды үнемі насихаттап, жалған жеңімпаздардың видеоларын жариялап келеді.

️Ал Наиль Тұрғанов онлайн-казино жарнамасы үшін 8 млн теңгеден астам қаржы алған.

️Нұрғазы Тоқтаров (Nakonay Qarapaiym) әлеуметтік желінде азаматтарды заңсыз ойындарға тарту мақсатында агрессивті науқан жүргізіп, жарнама үшін 15,8 млн теңге алып, оның жартысына жуығын сол платформалардың өзінде ойнап ұтылып қалған", — дейді агенттіктің ресми өкілі.

Ведомство мәліметінше, өкінішке қарай, бұл істе қыздар да белсенді.

"Мәселен Мариям Құлжабаева (@oomariko) интернет-казинода тіркелуге шақырған қарапайым стористерін небары 350 мың теңгеге бағалаған. Ал оның құрбаны болған отбасылар миллиондаған қаржысынан айырылып жатыр.

️Оған қоса, Зухра Хакиева, Диана Халметова, Әсем Аубакирова, Арина Байкова, Күмісай Айымбетова және басқа да блогерлердің аты белгілі", — деп атап өтті ҚМА ресми өкілі.

Ведомстводағылар онлайн-казино жарнамасы ойынға тәуелділікке бастайтын негізгі арна екенін біле тұра, әрекетін жалғастырып жатқан блогерлерге наразы.

"Олар адамдардың тағдырына немқұрайлы қарап, отбасылардың күйреуіне себеп болып жатыр.

Миллиондаған табысқа кенелген блогерлер айыппұлдарын төлеп, заңсыз әрекетін қайта жалғастырып жүр. Осыған байланысты агенттік мұндай әрекеттерді Қылмыстық кодекстің 28-бабының 5-тармағы аясында – заңсыз ойын бизнесіне көмектесу ретінде қарастыруға ниетті.

Сонымен қатар, қаржы пирамидаларын жарнамалағандағыдай, онлайн-казино жарнамасы үшін де қылмыстық жауапкершілік енгізу бастамасы көтерілді", — делінген хабарламада.

ҚМА блогерлерге үндеу жасап, жарнама түріндегі контент таратумен айналысатын әрбір тұлға заңды қатаң сақтауға тиіс екенін айтты. Агенттік заңсыз ойындарды насихаттаудан бас тартып, адамдар алдындағы жауапкершілікті сезінуге шақырады.

Мәтіннен қате тапсаңыз, бізге жазыңыз