Түркістанда медициналық көмек көрсетуге барған фельдшер соққыға жығылды. Түсік тастау қаупімен шақыртқан келіншекті көруге барған медицина қызметкерін пациенттің күйеуі ұрып тастаған, деп хабарлайды КТК арнасы.

Оқиға жедел жәрдем шақыртқан ерлі-зайыптының пәтерінде болған. 26 жастағы фельдшер түсік тастау мен соқыр ішектен күдіктеніп, аяғы ауыр келіншектің ішін ұстап тексерген. Алайда оның әрекеті науқастың күйеуіне ұнамай қалған. Ер адам ашуға бой алдырып, медицина қызметкерін соғып тастаған.

"Алдымен бетінен жұдырықпен ұрды, оң жақ бетінен ұрды. Ұрған кезде басы қабырғаға соғылып, отырып қалды. Аяғымен бар күшімен бетінен тепті. Мең-зең болды. Кейін аяғымен үшінші рет тепті. Сол кезде иығына тиді. Иығына тигеннен кейін, анасы артынан құшақтап ажыратып алды", — деді жедел жәрдем станциясының практиканты Жанель Қуанышбек.

Ауыр соққы алған жедел жәрдем қызметкері миы шайқалып, қазір ауруханада жатыр.

"Тиісті диагностика зерттеуі жүргізіліп, жабық бас жарақаты, миының шайқалуы, көзінің жұмсақ тіндері зақымданған, гематома диагнозымен травматология бөлімшесіне жатқызылды. Қазір науқастың денсаулығы орташа ауыр. Тиісті мамандардың кеңесі тағайындалды", — деп хабарлады аурухана өкілдері.

Жедел жәрдем станциясының ақпаратынша, қос тарап келісімге келіп, жәбірленуші өзін соққыға жыққан азаматқа кешірімін берген. Фельдшер полицияға арыз жазбаған. Алайда медициналық мекеме еңбек инспекциясына арыз берген.

Дереккөз: КТК.

Мәтіннен қате тапсаңыз, бізге жазыңыз