Орал қаласының тұрғыны жарамсыз автокөлік үшін төленген қаржысын қайтарып алу үшін №2 қалалық сотқа жүгінді, деп хабарлайды Egemen.kz.

БҚО бойынша сауда және тұтынушылар құқығын қорғау департаментінен мәлім еткеніндей, тұрғын өткен жылы 30 мамырда қаладағы автосалондардың бірінен 17 млн 840 мың теңге тұратын автокөлік сатып алған.

Талап арызда жазылғанындай, небәрі 15 мыңнан астам шақырым жол жүргеннен кейін автомобиль сынып қалып, сатушыға қайтарылған.

Автокөліктің сыну себептерін анықтау созылып кеткендіктен, тұтынушы жауапкерден тауардың техникалық жай-күйі туралы деректер беруді сұраған.

Сатушы өз жауабында автокөліктің техникалық жай-күйі жарамсыз екендігін мойындаған. Бұдан кейін тұтынушы тауарды алмастыруды немесе сату-сатып алу келісім-шартын бұзып, көлік құнын толық қайтаруды талап еткен. Алайда бұл талап қанағаттандырылмағаннан кейін тұрғын автокөлік құнына қоса 7 млн 784 мың теңге тұрақсыздық айыбын, 3,6 млн теңге залалды және сот шығынын өндіру жөнінде сотқа жүгінуге мәжбүр болған.

Сот талқысы барысында сот-сараптамалық зерттеу негізінде автокөлікте ақаулықтар бар екені анықталды.

- Сот шешімімен талапкердің пайдасына 17 млн 840 мың теңге көлемінде автокөлік құны, 1 млн 784 мың теңге тұрақсыздық айыбы, сот сараптамасын жүргізуге кеткен 112, 631 мың теңге, 177, 960 мың сот шығыны, 500 мың теңге өкілдің қызметі және 196,240 мың теңге мемлекеттік баж салығы өндірілді.

Жауапкер мұнымен келіспей, апелляциялық шағым түсірді. Апелляциялық сатыдағы сот алқасы № 2 Орал қалалық сотының шешімін өзгеріссіз қалдырды, — деп хабарлады ведомстводан.