Жетісу облысында көпқабатты тұрғын үй құрылысына бөлінген бюджет қаражатын жымқыру фактісі анықталды, деп хабарлайды KAZ.NUR.KZ Қаржылық мониторинг агенттігінің баспасөз қызметіне сілтеме жасап.

Жетісу облысында тұрғын үйлердің құрылысы кезінде бюджет қаражатын жымқыру фактісі бойынша тергеу жүріп жатыр.

Агенттік мәліметінше, 2021 жылы тапсырыс беруші мен мердігер ұйым арасында жалпы сомасы 1,7 млрд теңгеге екі көпқабатты тұрғын үй салуға келісімшарттар жасалған.

Алайда қол қойылған орындалған жұмыстар актілеріне қарамастан, бірқатар құрылыс-монтаж жұмыстары іс жүзінде атқарылмаған.

"Жоспарланған тоғыз қабаттың тек жетеуі ғана тұрғызылған, жылыту, сумен жабдықтау, электр жарықтандыру жұмыстары жүргізілмеген, сонымен қатар сыртқы әрлеу жұмыстары жоқ.

Осылайша, құрылыс аяқталмай, нысанды пайдалануға беру мерзімдері бұзылған. Мемлекетке келтірілген шығын 152 млн теңгеден асқан", — дейді ведомство өкілдері.

Сот санкциясымен құрылысшы компанияның мүлкіне тыйым салынды.

Іс бойынша мердігер ұйымның директоры және құрылысқа техникалық қадағалау жасаған компания қызметкерлері күдікті болып танылды.

Тергеу жалғасып жатыр. Қылмыстық-процестік кодекстің 201-бабына сәйкес өзге ақпарат жарияланбайды.

Мәтіннен қате тапсаңыз, бізге жазыңыз