Аталған факті бойынша көліктегі полициясы департаменті қылмыстық іс қозғады.

Алматы әуежайының терминалында ер адам өзін өртеді, полиция мен қауіпсіздік қызметкерлері өртті сөндірді, деп хабарлайды ПД баспасөз қызметі.

Ішкі істер министрлігі баспасөз қызметінің мәліметінше, зардап шегуші ауруханаға жатқызылды.

"2025 жылғы 25 тамызда сағат 22:06-да Алматы әуежайының "Т-1" терминалында ер адам билет кассасының жанында өзін-өзі өртеп жібермек болды", – делінген хабарламада.

Полицейлер әуежайдың қауіпсіздік қызметінің өкілдерімен бірге дереу қауіпсіздік шараларын қолға алды: олар өртті сөндіріп, жедел жәрдем шақырды. Дәрігерлер ер адамды қалалық ауруханаға жеткізді.

Оқи отырыңыз: Алматы әуежайы қызметкерін құтқарып қалған азамат мемлекеттік наградаға ұсынылады

Полиция оқиғаның алдын ала себебін атады. Көліктегі полиция департаментінің қызметкерлері ер адамның мұндай қадамға баруына сүйіктісімен жанжалдасып қалуы себеп болуы мүмкін екенін анықтады.

"Бұл әрекетке ер адамның бірге тұратын сүйіктісімен жанжалдасып қалуы себеп болғаны алдын ала анықталды. Оқиғаның барлық мән-жайы сотқа дейінгі тергеп-тексеру барысында анықталады", – делінген хабарламада.

Аталған факті бойынша көліктегі полициясы департаменті қылмыстық іс қозғады. Тергеу амалдары басталды. Қазіргі уақытта оқиғаның себебі мен мән-жайы анықталып жатыр.