Бұл туралы Алматы қаласының әкімдігі хабарлады.

Бүгін, 26 тамыз күні сағат 21:45-те Алматының Орталық стадионында УЕФА Чемпиондар лигасының плей-офф кезеңі аясында "Қайрат" пен "Селтик" арасында қарымта ойын өтеді, деп жазады inbusiness.kz сайты.

Алматы әкімдігінің мәліметінше, жанкүйерлерге қолайлы жағдай жасау үшін жоғары жылдамдықтағы интернет, қосалқы электр қуаты, медициналық көмек, санитарлық инфрақұрылым және экологиялық мүмкіндіктер қарастырылған.

Одан бөлек жанкүйерлердің ыңғайы үшін сағат 18:00-ден бастап қаланың негізгі нүктелерінен стадионға және кері бағытта тегін автобустар қатнайды:

• "Қалқаман" ықшам ауданы (№ 7 қалалық аурухана аялдамасы);
• "Орбита" ықшам ауданы (Мұстафин – Торайғыров көшелерінің қиылысы);
• "Айнабұлақ" ықшам ауданы (Мақатаев – Павлодар көшелерінің қиылысы);
• "Халық Арена" аялдамасы (солтүстік бағыт);
• Алматы-1 теміржол вокзалы;
• Алматы-2 теміржол вокзалы;
• Наурызбай аудандық ХҚКО;
• Момышұлы – Мөңке би көшелерінің қиылысы.

Стадион есігі жанкүйерлер үшін сағат 18:45-те ашылады.

Жалпы "Қайрат" – "Селтик" матчында қауіпсіздікті 1,5 мың полиция қызметкері қамтамасыз етеді.