Нью-Йоркте биылғы жылдың соңғы Үлкен дулыға жарысы – АҚШ ашық чемпионаты (US Open) басталды.

Қазақстанның үздік теннисшілері алғашқы айналымда сәтті өнер көрсетті. Елена Рыбакина алғашқы матчында 18 жасқа дейінгі ITF Juniors рейтингінің көшбасшысы, америкалық Джульетта Пареханы (турнирге wild card арқылы қатысқан) 6:3, 6:0 есебімен айқын жеңді. Кездесу бір сағаттан сәл астам уақытқа созылды. Екінші айналымда Рыбакина чехиялық Тереза Валентовамен (WTA – 96) кездеседі.

Естеріңізге сала кетейік, өткен жылы Елена Рыбакина US Open турнирінде сәтсіз өнер көрсетті. Алғашқы айналымда ол аустралиялық теннисші Дестани Айаваны (WTA рейтингінде – 168-орын) 6:1, 7:6 есебімен ұтты. Алайда екінші айналымда франциялық Джессика Поншемен (WTA – 129) кездесудің алдында денсаулығына байланысты жарыстан бас тартуға мәжбүр болды.

Тағы бір қазақстандық теннисші Юлия Путинцева (WTA – 55) да жарысты жеңіспен бастады. Ол Италия өкілі Элизабетта Коччареттоны (WTA – 85) 6:4, 7:6 (7:4) есебімен ұтты. Енді Путинцева келесі кезеңде ресейлік Анна Калинская (WTA – 29) мен wild card иегері Клерви Нгунудың арасындағы кездесудің жеңімпазымен кортқа шығады.