ҚР Мемлекеттік күзет қызметі уақытша шектеулер Иордания Королі Абдалла II бен әл-Хусейннің елімізге ресми сапары кезінде енгізілетінін мәлімдеді, деп жазады Egemen.kz.

Бұған дейін Ақорданың баспасөз қызметі 26-27 тамыз күндері Президент Қасым-Жомарт Тоқаевтың шақыруымен 26-27 тамыз күндері Қазақстанға Иордания Королі II Абдалла бен әл-Хусейн келетінін хабарлаған болатын.

«Қазақстанға Иордания Королінің сапары барысында қаланың жекелеген көшелерінде көлік құралдары мен жаяу жүргіншілердің қозғалысына уақытша шектеу енгізіледі. Дайындық іс-шараларында арнаулы мемлекеттік және құқық қорғау органдарының, сондай-ақ ҚР Қарулы Күштерінің ресурстары, оның ішінде әскери авиация мен техника пайдаланылады», делінген хабарламада.

Мемлекеттік күзет қызметі Астана қаласының тұрғындары мен қонақтарынан халықаралық дәрежедегі маңызды оқиға кезінде қауіпсіздікті қамтамасыз ету бойынша жүргізілетін іс-шараларға түсіністікпен қарауды сұраған.

Айта кетейік, Иордания Королі Абдалла II бен әл-Хусейннің Астанаға сапары барысында сауда-экономикалық және мәдени-гуманитарлық салалардағы Қазақстан-Иордания ынтымақтастығын одан әрі нығайту мақсатында жоғары деңгейдегі келіссөздер өтеді.