Қазақстанда 2025 жылдың басынан бері киберқылмысқа қарсы күрес нәтижесінде 6 ұйымдасқан қылмыстық топ әшкереленді.

Ішкі істер министрлігінің дерегінше, 75 SIM-box және 89 мыңнан астам SIM-карта тәркіленіп, 67 миллион жалған қоңырау бұғатталды.

«Антифрод» жедел-профилактикалық іс-шаралары биыл 18-20 ақпанда және 13-15 мамырда өтті. Оның барысында заңсыз SIM-box қолдану фактілері анықталды.

Министрлік киберқылмысқа қарсы 109 елдің арнайы бөлімшелерімен ақпарат алмасып отырғанын хабарлады. Сонымен қатар интернет-алаяқтықтың алдын алу үшін ел бойынша 34 мыңнан астам түсіндіру кездесулері өткізілді.