Жолсеріктер еңбек жағдайына байланысты шағымданып Президент Қасым-Жомарт Тоқаевқа, "ҚТЖ" АҚ басқарма төрағасы Талғат Алдыбергеновке және облыс әкімі Нұрдәулет Килыбайға ашық хат жолдады.

"Otpan Logistic" компаниясына қарасты №109 және №110 Маңғыстау – Ақтөбе бағытындағы пойыздарының жолсеріктері наразылыққа шықты, деп жазады inbusiness.kz сайты Lada.kz басылымына сілтеме жасап.

Жолсеріктердің сөзінше, бастапқыда компания мен қызметкерлер арасындағы келісімшарт қолайлы болған. Кейін жұмысшылар әлеуметтік жеңілдіктер мен артықшылықтардың бір бөлігінен айырылған. Әлеуметтік пакет қысқарып, пансионаттар мен тоқсандық төлемдер жойылған.

Қызметкерлердің айтуынша, тіпті 109 және 110 пойыздарды тендер арқылы сату жоспарланып отыр, бірақ жолсеріктер "жекенің қолына өтуді" қаламайды. Енді қызметкерлер "Жолаушылар тасымалы" АҚ қарамағына қайта өткізуді сұрап отыр.

Жолаушылар Маңғыстау-Ақтөбе бағыты бойынша жолаушылар тасымалы сапасына қатысты мәселені бұған дейін де көтерген. Бұл бағыттағы пойызға жекеменшік "Otpan Logistic" серіктестігі қызмет көрсетеді.

Қазақстанның теміржол жолаушылар тасымалы нарығында 15 компания жұмыс істейді: ұлттық оператор – "Жолаушылар тасымалы" АҚ және 14 жеке жауапкершілігі шектеулі серіктестік.