Көкшетауда өткен "Көкшетау шамдары" жартылай марафонында қайғылы жағдай болды, деп жазады inbusiness.kz сайты.

35 жастағы әйел 5 шақырымдық қашықтықта өзін жайсыз сезініп, есінен танып қалды.

Оқиға 23 тамыз күні кешкі сағат 21:50-де Сағдиев пен Жағалау көшелерінің қиылысында, жарыстың 4-ші шақырымында тіркелген.

Дәрігерлер алғашқы көмек көрсетіп, жедел жәрдем оны облыстық көпбейінді ауруханаға жеткізді. Алайда бірнеше мәрте жүрек соғысы тоқтап қалған әйелді құтқару мүмкін болмады.

Ол 24 тамыз күні таңғы 05:45-те қайтыс болды. Өлімнің нақты себебі сот-медициналық сараптамадан кейін анықталмақ.

Ұйымдастырушылардың айтуынша, барлық қатысушылар жарысқа тіркелу кезінде өз денсаулығына жауапты екенін растайтын қолхатқа қол қойған. Жүгіру бағыты мен медициналық көмек алдын ала қамтамасыз етілген.

Ақмола облыстық Полиция департаменті бұл факті бойынша қылмыстық іс қозғалғанын хабарлады.