Түркістан облысының Сарыағаш қаласына Р-1 каналынан магистральды ауыз су құбыры тартылып жатыр .

Себебі соңғы жылдары суды тұтыну көрсеткіші артып, халық тіршілік нәрінен таршылық көре бастады. Жаз айларында ауыз су белгіленген уақытпен берілетін болды. Аудандағы су тапшылығы қашан толық шешіледі?

Сарыағаш қаласы Телемұнара мөлтек ауданының тұрғыны Жүсіп Бексейітовтың айтуынша, маусым айынан бері су тапшы. Тіршілік нәрі күніне 3 сағат беріледі, сол кезде құдықты толтырып аламыз дейді.

Жүсіп Бексейітов, Сарыағаш қаласының тұрғыны:

- Жазда бақша суарамыз, көгалды. Мынаның бәрін суғармасақ қуарап кетеді ғой, су береміз. Сол 2-3 күнге жетеді. Керек кезде қайтадан толтырып қоямыз.

Телемұнара мөлтек ауданында 1400 абонент бар. Халықты сумен аудан әкімдігіне қарасты коммуналдық мекеме қамтамасыз етеді. Мамандар жаз мезгілінде су тұтыну мөлшері көбейгендіктен тапшылық болатынын айтады.

Серік Қарақұлов, аудандық ТҮКШ бөлімінің басшысы:

- Төрт секторға бөлгенбіз бір мөлтек ауданды. Кезекпен беріп отырамыз. Күндігіне биік жерде орналасқан тұрғын үйлерге 2-3 сағат, төменде орналасқандарға жер қыртысына байланысты 4-5 сағат уақытпен беріледі. Бірақ күнделікті беріліп отыр. Қыркүйек айынан бастап су тапшылығы орын алмайды. Барлығы қалыпты жағдайға түседі.

Жазда Сарыағаштан бөлек ауылдарда су тапшылығы сезіледі. Мәселен, ауданда 14 ауылдық округке қарасты 63 елдімекен бар. Оның 52-сі орталықтандырылған ауыз су жүйесімен қамтылған. Оларға да су уақытпен беріледі. Аудан халқын 24 сағат ауыз сумен толық қамту үшін республикалық бюжеттен 6 млрд 850 млн теңге қаржы бөлінді. Оған Р-1 каналынан ұзындығы 35 шақырым болатын ауызсу құбыры жүргізіліп жатыр.

Сейсенбай Ырысов, учаске басшысы:

- Магистралды су құбырын тартып жатырмыз, құбырдың диаметрі 630 мм. Қазіргі уақытта 35 шақырының 33,5 шақырымында құбырын көміп, дайындап қойдық. Енді 1,5 шақырымы қалды. Өзіміздің жобамыз бойынша қазан айының соңына бітіреміз деген жоспарымыз бар.

Ауқымды жоба 3 кезеңнен тұрады. Қазір бірінші кезеңі аяқталуға жақын. Соның нәтижесінде жыл соңына қарай Сарыағаш қаласы мен 20-дан астам елдімекенге таза ауыз су беріледі деп жоспарлауда.

Мұрат Байқабылов, аудан әкімінің орынбасары:

- Кестемен ішіп отырғандар 24 сағат су ішеді деп толық айта аламыз. Әр елді мекеннің басынан мынадай су жинау қоймаларын салып, сол арқылы суды беріп отырамыз. Судың көзі Өзбекстан Республикасынан келіп жатқан каналдан аламыз. Таудың суы тәтті, ешқандай тұщы емес. CЭС-тің талаптарына сәйкес, толығымен ішуге жарамды деп берілген қорытынды.

Екінші кезең келер жылы іске асады. Онда 6 мың текше метрлік станциядан 9 мың текше метрлік су жинау қоймасына қарай құбыр тартылмақ. Ал үшінші кезеңде осы су қоймасынан Келес ауданына қарай су құбыры жүргізіледі. Егер республикалық бюджеттен жоспарланған қаржы уақытында бөлінсе, 2027 жылы Сарыағаш ауданы ғана емес, Келес ауданы да 24 сағат таза ауыз сумен қамтылады, дейді жауаптылар.

Жандос Жұмабек, Ерболат Әбіш