Ақтөбеде 5 жасар қыз ойын-сауық орталығында аттракционнан жарақат алып, саусағынан айырылды, деп хабарлайды Skifnews.kz ақпарат порталы.

Қайғылы жағдай 21 тамыз күні болған. Аттракционға мінген кезде қыздың қолы қозғалыстағы механизмге қысылып, соның салдарынан оның саусағы түгелдей үзіліп кеткен. Баланы шұғыл түрде облыстық көпсалалы балалар ауруханасына жеткізгенімен, дәрігерлер саусақты сақтап қала алмады.

– «Жарақаттық ампутация тіркелді. Саусақ қатты зақымданған, бұралып кеткен. Әкелінген саусақты қайта тігу мүмкін болмады. Біз тек хирургиялық өңдеу жасап, таңу жүргіздік», – деді Ақтөбе облыстық балалар ауруханасының травматологы Қуантай Махамбетов.

Жараланған қыздың анасының айтуынша, олар Қобда ауданынан Ақтөбеге мектепке қажетті заттар алуға келген. Оқиға болған сәтте балалар ересектердің қарауынсыз ойнап жүрген.

– «Аттракционның төменгі жағында ашық механизм тұрған. Қызым соған қолын тигізгенде, саусағы қысылып, үзіліп кетті. Барлығы ашық, ешқандай қауіпсіздік шарасы жоқ. Неге бақылау жасалмайды? Оның үстіне механизм балалар оңай қол жеткізе алатындай төменде орналасқан. Енді бізге мүгедектік рәсімдеуге тура келеді», – деді баланың анасы.

Қазір бүлдіршін дәрігерлердің бақылауында. Ал ата-анасы ойын-сауық орталығының иесін сотқа беріп, моральдық және материалдық шығынды өтеуді талап етпек.

Ақтөбе облыстық полициясы аталған факт бойынша ҚР Қылмыстық кодексінің «Қауіпсіздік талаптарына сай келмейтін тауарларды шығару немесе сату, жұмыстарды не қызметтерді орындау» бабымен тергеу басталғанын мәлімдеді.