Тұрғындардың айтуынша, анасы екі күннің бірінде ұлын ішімдікке "ақша тауып кел" деп жұмсайды екен.

Атырауда көше кезіп, далада түнеп жүрген 14 жастағы жеткіншектің жағдайы жұрттың жағасын ұстатты, деп хабарлады 31 арнаның Информбюро ақпараттық бағдарламасы.

Қаңғыбасқа айналған баланы тұрғындар түсіріп, дабыл қаққан. Белгілі болғандай, ұлына ішімдікке салынған анасы тамақ бермей, аш-жалаңаш үйден қуып шығады екен. Тіпті, араққа ақша табуға мәжбүрлеп, күн көрсетпейді дейді көршілері. Тағдыр тәлкегіне түскен баланың үш жасар қарындасы да қараусыз қалған.

14 жастағы Кириллдің далада түнеп жүргенін көршілері талай мәрте көріпті. Тұрғындардың айтуынша, анасы екі күннің бірінде ұлын ішімдікке "ақша тауып кел" деп жұмсайды екен. Ал талапты орындамаса үйге кіргізбей қаңғыртып жіберетін кездері көп болған дейді.

"Отбасылары жұмыс істемейді, ішеді. Балаға қарамайды-ау. Көбіне қаңғып далада жүреді. Базарда, анда-мында. Ата-ана арақ ішкен соң қызық болмайтыны рас қой. Мектепке бармайды. Арақтан көз ашпайды", – дейді Атырау қаласының тұрғыны Марат Хасанов.

Аш-құрсақ көше кезіп жүретін баланың үш жасар қарындасы бар. Қаршадай қыз ішімдікке салынған анасы мен нағашы ағасының жанжалына күнде куә болып, әбден шошып қалған дейді тұрғындар.

Балаларға жаны ашыған жұрт талай мәрте полицияға жүгініпті. Тәртіп сақшылары соңғы шақыртуға келгенде Кириллді бейімдеу орталығына, кішкентай бүлдіршінді сәбилер үйіне орналастырған.

"Келгенде енді көңіл-күйі болмады. Мамасын іздеді. Жылады. Қазіргі таңда баланың жағдайы жақсы, көңіл-күйі де жақсы. Бұған дейін де бала түскен болатын. Орталықтағы балаларға, біздерге тез бейімделіп кетті. Ақкөңіл, жақсы. Біздер балаға ең бірінші психологиялық көмек көрсетіп жатырмыз", – деді Атырау қаласы кәмелетке толмағандарды бейімдеу орталығының басшысы Құндыз Ғинаятова.

Полиция осыдан бір жыл бұрын балаларға қатысты міндеттерін орындамағаны үшін жалғызбасты ананы әкімшілік жауапкершілікке тартқан екен. Енді кәмелетке толмағандардың ісі жөніндегі комиссия әйелді ата-ана құқығынан айыру мәселесін қарастырмақ.

"Атырау қаласында өзінің кәмелетке толмаған балаларының тәрбиесімен және олардың қауіпсіздігін қамтамасыз етпеген ата-анаға қатысты қазіргі уақытта іс-құжаттар жинақталуда. Жинақталған іс-құжаттар кәмелетке толмағандардың ісі жөніндегі комиссияға ұсынылатын болады", – деді Атырау облыстық полиция департаментінің баспасөз хатшысы Мейірім Ердәулет.

Білім басқармасындағылар келіншектің ажырасқанын және арбаға таңылғанын жеткізді. Мамандар 14 жастағы баланың сабақтан көп қалатынын жасырмайды. Сол уақытта сегізінші сыныптың оқушысына ұстаздар барып, жағдайын біліп жүрді дейді. Жауаптылар бұл отбасы үнемі біздің бақылауымызда болды деп сендірді.

Оқи отырыңыз: Бір топ оқушы жабылып ұрған 16 жастағы жеткіншек мүгедек болып қалды