Ирак үкіметі елдегі су қорының қазіргі көлемі кейінгі 80 жылдағы ең төмен межеге кемігенін мәлімдеді. Өткен қыста жауын-шашын күрт азайғандықтан және өзендердің жоғарғы ағысындағы бөгендер су ағынына бақылауды күшейткендіктен, Иракта су тапшылығы күрделене түсті, деп жазады inbusiness.kz сайты.

Lianhe Zaobao басылымының хабарлауынша, Ирактың Су ресурстары министрлігінің ресми өкілі Халед Шаммар 25 мамыр күні жаз шыққанда елдегі су қоймаларында кем дегенде 18 миллиард текше метр су болуға тиіс екенін айтты.

"Алайда қазір небәрі шамамен 10 миллиард текше метр су жиналған… Былтыр біздің стратегиялық қорымыз бұдан екі есе көп болған. Соңғы 80 жылда мұндай төмен көрсеткіш тіркелген емес", — деді ол.

Ирак егіс алқаптарын ежелден Тигр мен Ефрат өзендерінің суымен суарып келеді. Алайда соңғы жылдары қос өзеннің су көлемі азая бастаған. Шаммардың айтуынша, қазіргі уақытта Ирак алуға тиісті судың тек 40 пайызына ғана қол жеткізіп отыр.

Бұған дейін БҰҰ Иракты климаттың өзгеруінен ең көп зардап шегуі мүмкін бес елдің қатарына қосқан.

Су тапшылығына жауын-шашынның аздығымен қатар, Түркия мен Иран аумағында салынып жатқан бөгеттер де себеп болып отыр. Бөгендер Иракқа келетін су көлемін одан әрі азайтып, су тапшылығын үдете түскен.

Қуаңшылық салдарынан фермерлер егіс алқаптарын бос тастауға мәжбүр. Үкімет те ауыл шаруашылығына пайдаланылатын жер көлемін шектеуге кірісіп, ауызсумен қамтуды басты орынға қойып отыр. Биыл билік шамамен 375 мың гектар көгалдандырылған ауылшаруашылық алқабын сақтап қалуды көздеп отыр, бұл негізінен астыққа емес, экологиялық жасыл желекке арналған аймақ. Ал өткен жылы егіс алқаптарының ауданы шамамен 250 мың гектарға жетіп, оған жүгері, күріш, жеміс ағаштары, т.б. дақылдар егілген болатын.