Қарағандылық Анар Шаймерденова қанаты қайырылып, ұша алмай қалған жапалақтың 8 айлық балапанын құтқарып қалған. Қазір ол қолға үйренген, деп хабарлайды 24KZ сайтына сілтеме жасаған KAZ.NUR.KZ.

Қарағанды қаласының тұрғыны Анар Шаймерденова Бұқар жырау ауданында табиғат аясында серуендеп жүріп, жаралы құсты байқап қалған. Қанаты қатты зақымданған жапалақтың балапаны ұша алмай жатып қалған екен. Ол құсты бірден Қарағандыдағы ветеринарлық клиникаға жеткізген.

"Келе жатып шөп арасындағы қыбырлаған құсты байқап қалдым. Қанаты салбырап тұрды. Ұша алмай жатқанын көріп, жүрегім ауырды. Бірден орап алып, ветеринарға апардым. Қолымнан келген көмекті көрсетуге тырыстым", — дейді Анар Шаймерденова.

Мамандар зерттеп, құстың иық кермесі сынып, еті жыртылғанын анықтаған. Алайда қанатын сақтап қалу мүмкін болмапты.

"Операция күрделі болды. Әсіресе жабайы құстар анестезияны көтермейді. Бірақ бұл құс шыдамды болып шықты. Түнде жемтік іздеп жүріп қатты затқа соғылған. Жарақат орыны біткенше күтім керек", — дейді ветеринар Евгений Крюков.

Қазір Анар құсты үйінде күтіп-баптап жатыр. Оған тіпті, Қанат деп ат қойған.

"Қанатынан айырылғанын естігенде көңілім түсіп кетті. Ең бастысы, ит-құсқа жем болмай аман қалды. Қазір маған үйреніп алды. Білмегенімді мамандардан сұрап күтіп-баптап жатырмын. Негізі табиғи ортаға жақын жерде тіршілігін жалғастырса жақсы болар еді. Кең даланың құсы ғой", — дейді ол.

Мәтіннен қате тапсаңыз, бізге жазыңыз