15 қыркүйектен бастап, пәтер иелері кооперативі жауапты субъект ретінде тіркеліп, дәрежесі басқарушы компаниялармен теңеседі.

Енді тұрғын үй иелері баспананы күтіп ұстау ақысын үшке бөліп төлейді, деп хабарлады 31 арнаның Информбюро ақпараттық бағдарламасы.

15 қыркүйектен бастап әрбір меншік иесі ағымдағы, жинақтаушы және мақсатты төлемдерге ақша жинайды. Оның бірі үйді жалпы күтіп ұстауға, екіншісі күрделі жөндеуге, ал үшіншісі күтпеген шығындарға жұмсалмақ. Негізі тұрғындардың көбі бұған дейін бұл шаруа үшін тек бір төлем жасайтын. Енді ол үшке бөлінеді.

Қыркүйектен бастап тұрғын үйді басқару саясатында өзгеріс болғалы тұр. Бұдан былай көппәтерлі тұрғын үйдегі баспана, қойма мен көлік тұрағы бар адамдар стандартты "үйді күтіп-ұстау" төлемінің орнына ағымдағы, жинақтаушы, мақсатты деген үш түрлі жарна төлейді. Оның екеуі міндетті болмақ.

Ағымдағы дегені ай сайынғы шығындарға, жинақ шоты күрделі жөндеуге арналады. Ал мақсатты жарна тұрғындардың қалауына қарай ашылады және жоспарланбаған шығындарға жұмсалады.

Сомаға келсек, Алматыдағы тұрғын үйлерге жауапты басқарма өкілінің айтуынша, тұрғындар өзі белгілейді.

"Ішінара жиналыс жасап, шаршы метріне алатын ақыны қояды. Бірақ оның мөлшері қала мәслихаты бекіткен ең төменгі сомадан аз болмауға тиіс. Биыл ол 40 теңге. Жетпей жатса өздері көтере береді. 50, 60,70,150, тіпті 200 теңгелі тарифтер бар бізде. Төлемдер негізі ескі үйлерде көбейеді. Ал әлгі ЖК-лар, яғни тұрғын үй кешендері, оларда енді қызмет түрі көп. Сондықтан оларда тарифтер 150, 200 теңге, ары қарай кете береді", – деді Алматы қаласы коммуналдық инфрақұрылым және тұрғын үй инспекциясы басқармасының өкілі Жандос Қайырханов.

15 қыркүйектен бастап, пәтер иелері кооперативі жауапты субъект ретінде тіркеліп, дәрежесі басқарушы компаниялармен теңеседі. Олар мүлік иелері бірлестіктерімен шарт немесе жиналыс хаттамасы бойынша жұмыс істейді. Ал бір үйде 36 пәтерден көп болса, ол баспананың тұрғындары дәл сол ПИК немесе басқарушы компаниямен келісімшартқа отыруға тиіс. Әр үйдің ағымдағы және жинақ шоттары ашылып, бір мақсатқа жиналған қаржы екінші бағытқа жұмсауға жол берілмейді.