Танымал актёр Жан Байжанбаев атына қатысты тараған дауға жауап берді , деп хабарлайды Skifnews.kz ақпарат порталы.

Бұған дейін қазақстандық әйелдің бірі қызына актёрмен бірге фильмге түсу үшін 1,5 млн теңге талап етілгенін айтып, наразылық білдірген болатын. Айтуынша, бұл жағдай Jаn Production компаниясының кастингінде орын алған.

Актёр бұл мәселеге тікелей қатысы жоғын айтып, ресми түрде мәлімдеді.

– «Мен бұл компанияның иесі де, тең иесі де емеспін. Кастинг өткізбеймін, оған қатыспаймын. Тек жобаға шақырылатын актёрмін. Сонымен қатар олардың амбассадорымын. Компанияның иесі Ержан есімді азамат менің шығармашылығымды жақсы көріп, студияны Jun Production деп атауға рұқсат сұраған еді», – деді Байжанбаев.

Ол баға саясатына да араласпайтынын атап өтті:

– «Онда қандай тариф бар екенін білмеймін. Мені тек өз жұмысым ғана қызықтырады», – деді ол.

Актёр өзінің 47 жылдық шығармашылық жолында ешқандай дауға, алаяқтыққа қатыспағанын, атының бұған дейін кір келмегенін айтты.

– «Жылдар бойы жинаған абыройыма көлеңке түсірмеңіздер. Теріс пікір қалыптастырмауды сұраймын», – деді ол.

Сонымен бірге Байжанбаев әйелдің сөзі ішінара шындық болуы мүмкін екенін де жоққа шығармады.

– «Ата-аналарға кейін қатысу ақысы туралы айтқан жағдай болуы ықтимал. Кастинг тегін, бірақ қатысу ақылы», – деп түсіндірді актёр.

Сондай-ақ ол кейбір БАҚ-ты сынға алып, өзіне тікелей хабарласып, ресми пікір алу қажеттігін жеткізді.

– «Мені қаралаған ақпарат таратқан журналистер дұрыс әрекет етпеді. Мен Jun Production-ға қатысым жоқ. Бұл – менің абыройым мен намысыма нұқсан келтіреді. Егер ар-ождандарыңыз болса, менен ауызша да, жазбаша да кешірім сұрауларыңызды өтінемін. Қазір Астанадамын, кез келген сұраққа ашық жауап беруге дайынмын», – деді Жан Байжанбаев.

Посмотреть эту публикацию в Instagram

Публикация от Жан Байжанбаев (@zhan_baizhanbayev)