Премьер-Министр Олжас Бектенов Жамбыл облысына жұмыс сапары аясында Мемлекет басшысының көлік-логистика саласын дамыту мақсатында шекаралық өткізу пунктерін жаңғырту жөнінде берген тапсырмасының орындалу барысын тексерді, деп хабарлайды Үкіметтің баспасөз қызметі.

Үкімет басшысы Қырғызстанмен шекарада орналасқан «Қордай» және «Қарасу» автокөлік өткізу бекеттерінде болып, инфрақұрылыммен, өткізу қабілетімен, туындап отырған мәселелермен және одан әрі дамыту жоспарларымен танысты.

Көлік министрі Нұрлан Сауранбаев пен ҚР ҰҚК Шекара қызметі директорының орынбасарының уақытша міндетін атқарушы Ұлан Абиков өткізу бекеттеріндегі жағдай, сондай-ақ Премьер-Министрдің тапсырмасы бойынша жүргізілген тексерулердің қорытындысы туралы баяндады.

Қазіргі уақытта ЕАЭО елдерімен шекарада 39 автокөлік өткізу пункті бар. Олардың екеуінде жөндеу жұмыстары аяқталған, 10 пунктте жаңғырту басталды. Жөндеу жұмыстарының бір бөлігі Қазақстан–Ресей шекарасында жүргізілуде, алдағы уақытта басқа да өткізу бекеттері қамтылады.

«Қордай» бекетінде өткен реконструкция нәтижесінде қозғалыс жолақтары 4-тен 8-ге, төлқұжаттық қадағалау кабиналары 20-дан 40-қа дейін көбейді. Нәтижесінде өткізу қабілеті жолаушылар ағыны бойынша 4 есе, автокөлік бойынша 2,7 есе артты. «Қарасу» бекетінде басталған жаңғырту жұмыстары тәуліктік өткізу қабілетін 700-ден 2 мыңнан астам көлікке дейін арттыруға мүмкіндік береді.

Премьер-Министр шекара нысандарының трансшекаралық ынтымақтастықты дамытудың және халықаралық жолаушылар мен жүк тасымалын қамтамасыз етудің маңызды бөлігі екенін атап өтті. Ол жөндеу жұмыстарының сапалы әрі уақтылы орындалуын, рәсімдерді жеделдету үшін цифрлық технологияларды енгізуді жандандыруды, сондай-ақ азаматтар мен сыртқы экономикалық қызметке қатысушыларға қолайлы жағдай жасауды тапсырды.

Сапар барысында «Батыс Еуропа – Батыс Қытай» халықаралық дәлізінің құрамында тауарларды сақтау, өңдеу, шоғырландыру және өткізу орталығына айналатын индустриялық-сауда-логистикалық кешен салу жобасы таныстырылды.

Олжас Бектенов құрылыс мерзімінің созылып кетуіне байланысты сын айтып, қысқа мерзімде тиісті шаралар қабылдауды және жұмыс қарқыны мен сапасын қатаң бақылауды тапсырды.