Астана қатарынан екі жыл бойы өңірлерден келетін мигранттар саны бойынша Алматыны басып озды.

2025 жылдың бірінші жартысында өңірлерден ел астанасына жаңа тұрақты тұрғылықты жері ретінде көшіп келіп, тіркелгендер саны 80,4 мың адамды құрады, бұл өткен жылдың сәйкес кезеңімен салыстырғанда 25% көп, деп хабарлайды inbusiness.kz сайты ҚР ҰЭМ СЖРА таратқан дерекке сілтеме жасап. Бұл – соңғы 15 жыл ішіндегі ең жоғары көрсеткіш.

Нәтижесінде қаңтар-маусым қорытындысы бойынша көрсеткіш жаңа психологиялық межеден асты – бұған дейін мұндай деңгей тіркелмеген. Оның үстіне өсім жоғары база аясында байқалып отыр: бір жыл бұрын өңір тұрғындарының астаналық атануы бірден 75% артып, 64,5 мың адамға жеткен еді.

Өңірлер арасында елордаға көшу қарқыны төмендегідей:

• Ең жоғарысы – Ақмола облысы, бұл өңірден 14,5 мың адам;
• Түркістан облысы – 7,9 мың адам;
• Үшінші орында Алматы – 7 мың адам.

Осы үш өңір Астанаға келген ішкі мигранттардың 37%-ын қамтамасыз еткен.

Алайда кетушілер де бар. Қаңтар-маусымда астаналық тіркеуін басқа өңірге ауыстырғандар саны 43,6 мың адам болды. Олардың басым бөлігі жаңа тұрғылықты жер ретінде Ақмола облысын (11,5 мың адам), Алматыны (5,7 мың адам) және Түркістан облысын (3,9 мың адам) таңдаған. Бұл жағдайда алғашқы үш өңірдің жиынтық үлесі 48%-ды құрады.

Нәтижесінде өңірлерден Астанаға келушілер мен кетушілер арасындағы айырма (таза ішкі көші-қон) 36,8 мың адамды құрады. Бұл да Алматыдан жоғары – оңтүстік мегаполисте көрсеткіш 16,9 мың адамды құрады.

Шетелден келген иммигранттар, Астанаға қарағанда Алматыны таңдайды. 2025 жылдың бірінші жартысында шетелден тұрақты тұруға келгендер саны Астанада – 1 мың адам, ал Алматыда – 1,8 мың адамды құрады.