Жетісу облысының Сарқан ауданына қарасты Екіаша ауылындағы «Малый Баскан» өзенінде орналасқан ВБ ГЭС-2 гидроэлектр стансасында су құбыры жарылды, деп хабарлайды Egemen.kz.

Оқиғаның видеосы әлеуметтік желілерде тарап, жергілікті тұрғындар арасында алаңдаушылық туғызды. Бейнежазбадан су құбырының қатты қысыммен жарылып, су айналаға жайылып жатқанын көруге болады.

Оқыс оқиға 12 тамыз күні сағат 17:00 шамасында орын алған.

«Сарқан ауданы Екіаша ауылындағы «Малый Баскан» өзенінде орналасқан ВБ ГЭС-2 станциясында су құбыры жарылды. Нәтижесінде су тек станция аумағында ғана қалды, жақын маңдағы тұрғын үйлер мен елді мекендерге ешқандай зиян келген жоқ. Қазіргі таңда жағдай тұрақты, халық пен табиғи ортаға қауіп жоқ», деп мәлімдеді облыстық әкімдік.

«Baskan Power» ЖШС техникалық директоры Данияр Досабаевтың айтуынша, су ГЭС ғимараты арқылы сыртқа ағып кеткенімен, салдары жылдам жойылған.

«Біз ғимарат ішіндегі суды сорып шығардық. Қазір қалпына келтіру жұмыстары жүргізілуде. Елді мекенге, тұрғындарға және шаруашылықтарға зиян келген жоқ. Су толығымен өзен арнасына қайтарылды, экологиялық қауіп жоқ», деді ол.

Сонымен қатар әкімдік аталған стансада 90-ға жуық адамның жұмыс істейтінін және олардың барлығы жергілікті тұрғындар екенін атап өтті. Қазіргі таңда нысанда барлық жұмыстар штаттық режимде жалғасып жатыр.