Ұлттық Олимпиада комитетінің президенті Геннадий Головкин Бүкіләлемдік таеквондо федерациясының (World Taekwondo) президенті Чунгвон Чомен кездесті.

Бүкіләлемдік таеквондо федерациясы 2026 жылдан бастап "e-Taekwondo" атты жеке дисциплинаның жасөспірімдер арасындағы Олимпиада ойындары мен құрлықтық чемпионаттардың бағдарламасына сынақ ретінде енгізілетінін хабарлады, деп жазады inbusiness.kz сайты.

Кездесуге сондай-ақ Қазақстан ҰОК бас хатшысы Әлімжан Ақаев пен Қазақстан таеквондо федерациясының (WT) президенті Кудрәт Шамиев қатысты.

Тараптар халықаралық ынтымақтастықтың болашағын, таеквондоның олимпиадалық қозғалыс аясындағы дамуын, соның ішінде киберспорт бағытын талқылады.

Кездесу барысында бірлескен іс-шаралар өткізу жоспарына, сондай-ақ олимпиадалық қозғалыс құндылықтарын ілгерілетуге ерекше көңіл бөлінді.

Айта кетейік, Қазақстан таеквондо федерациясы 2026 жылғы Гран-при финалын өткізу құқығын жеңіп алды. Сол жылы 2027 жылғы әлем чемпионатын өткізуге өтінім беру жоспарланып отыр. Бұл бастаманы Қазақстан ҰОК жан-жақты қолдауға ниетті.

14-16 тамыз аралығында Астанада G-1 санатындағы халықаралық рейтингтік турнир – Kazakhstan Open 2025 өтеді.

Бүкіләлемдік таеквондо федерациясының ресми күнтізбесіне енген бұл жарыс үш жас санатын қамтиды: жасөспірімдер, жастар және ересектер.

Додаға 22 құрамадан 750 спортшы қатысатынын растады. Турнир жаңа халықаралық ережелер бойынша және жаңартылған KPNP K-2 электронды жүйесімен өтеді.

Қазақстанда алғаш рет осы жарыс аясында KPNP компаниясы арнайы ұсынған жаңа электронды қолғаптар қолданылады. Олар соққыларды дәл әрі объективті тіркеуді қамтамасыз етеді. Сондай-ақ елімізде тұңғыш рет Бүкіләлемдік таеквондо федерациясының көрсетілім командасы өнер көрсетеді. Арнайы шоу Астанадағы Бәйтерек маңында өтеді.

Бүкіләлемдік таеквондо федерациясының президенті Чунгвон Чо қазақстандық спортшылардың әлеуетін жоғары бағалап, серіктестік байланыстарды одан әрі нығайтуға дайын екенін жеткізді.

"Мен Қазақстанда таеквондоға деген үлкен қызығушылықты және спортшылардың жоғары дайындық деңгейін байқадым. Ел сенімді түрде дамып келеді және бұл спорт түрі мектептерде ұлттық деңгейде белсенді дамиды деп үміттенемін. Біздің ынтымақтастығымыз спортты дамытуға және бүкіл әлемдегі жаңа буын спортшыларын шабыттандыруға көмектесетініне сенімдімін", – деді Чунгвон Чо.

Осы орайда ҰОК басшылығы ұлттық спорт деңгейін арттыру үшін халықаралық спорт ұйымдарымен байланыс орнатудың маңыздылығын атап өтті.

"World Taekwondo-мен әріптестік орнату — Қазақстанның халықаралық аренадағы көкжиегін кеңейтеді. Мұндай серіктестіктер байланыстарды нығайтуға, тәжірибе алмасуға және спорт пен оның құндылықтарын ілгерілетуге бағытталған бірлескен жобаларды дамытуға мүмкіндік береді", – деді Геннадий Головкин.

Кездесу соңында тараптар екіжақты ынтымақтастықты одан әрі нығайтуға ниетті екендерін білдірді.