Жамбыл облысында Көктал ауылының үш баласына қатысты көпжылдық зорлық-зомбылық пен мәжбүрлі еңбек дерегі тергеліп жатыр. Туыстары тек өгей әкені ғана емес, жағдайдан хабардар болған ауыл әкімі мен имамды да жауапқа тартуды талап етуде, деп хабарлайды Skifnews .kz ақпарат порталы.

Оқиғаның қысқаша мазмұны

6 тамызда Талас ауданының Көктал ауылының тұрғыны үш баланың жоғалғаны туралы полицияға арызданған. Олар мал бағып жүрген жерінен із-түзсіз кеткен. Ертеңінде балалар Алматыдан туған әкесі мен нағашы апасының жанынан табылды. Кейін олар Таразға жеткізіліп, тұрмыстық зорлық-зомбылық құрбандарына арналған орталыққа уақытша орналастырылды. Балалардың анасында алғашқы некесінен туған үш ұлдан бөлек тағы үш кішкентай бала бар.

Сот шешімімен өгей әке екі айға қамауға алынды. Істі облыстық полиция департаментінің тергеу басқармасы жүргізіп жатыр.

Әкім мен имам бәрін білген

Бір апта бұрын әлеуметтік желіде балалардың бейнеүндеуі тарады. Үлкені өзін ұрып-соғып, мәжбүрлі түрде мал бақтырғанын, телефонын тартып алғанын айтты. Он жастағы Ұзақбай есімді бала да көмек сұрады. Ол төртінші сыныпта оқу керек болса да, тек екінші сыныпта оқиды, сандарды да білмейді. Балалардың нағашысы ауланың әкімі мен мешіт имамы бұл жағдайдан хабардар болғанын, бірақ ешқандай әрекет жасамағанын айтты.

— Біздің ісімізді бұрмалап жатыр. Талғар мен Таразда да сараптама өтті, зорлық-зомбылық фактілері расталды. Бірақ анасы азаматтық күйеуін жақтап отыр. Көкталдың әкімі Қайрат мырза жағдайды білген. Үйге жергілікті имам да барған, ол да бәрін көріп, білсе де әрекет етпеді. Ойын-той өткізгенше, балалар жайын ойлауы керек еді. Мен әкім мен имамды жауапқа тартуды талап етемін. Тіпті көршілер де білген. Ауылдағылар балалардың далаға шықпайтынын, футболдың не екенін білмейтінін көріп отырды. Колледж студенті деп формалды тіркеп қойған, ал шәкіртақысы — 120 мың теңгені өгей әке толықтай алып отырған. Неге мұғалімдер араласпады? Бәрі білді! Бірақ үндемеді! — дейді әйел.

Бұл — құлдық емес пе?

Оның айтуынша, тергеушілер жағдайды жеңілдетуге тырысып, «құлдық — бұл тек бала шынжырда отырып, аш қалса ғана» деп түсіндіреді. Ал бірнеше жылдық ұрып-соғу мен ауыр жұмыс оларша құлдыққа жатпайды.

— Балалар үш күннен бері дағдарыс орталығында. Ешқандай көмек көрсетілген жоқ. Тергеушілер ешқандай құлдық болмаған деп сендірмек. Ал олар бес жыл бойы ұрып-соғуға төзіп, қара жұмыс істеген. Біз тергеуге наразыбыз, көмек жоқ, — дейді ол.

Сонымен қатар, бұған дейін тек екі бала зардап шекті делінсе, шын мәнінде үшеуі екені анықталды.

— Бұл — менің егіз інім. Біз туған әкемізге барғымыз келеді. Кішкентай інішегімізді де өзімізге алғымыз келеді. Оны балалар үйіне бермек, біз бұған қарсымыз, — дейді 16 жастағы жеткіншек президенттен көмек сұрап.

Не болады?

Жамбыл облысының әкімі Ербол Қарашөкеевтің тапсырмасымен орынбасары бастаған арнайы жұмыс тобы құрылды. Олар оқиғаның мән-жайын зерттеп, балалардың қауіпсіздігін қамтамасыз етпек. Сондай-ақ аймақтағы барлық білім беру ұйымдарын тексеру жоспарланып отыр. Полиция кез келген зорлық-зомбылық фактісі, әсіресе кәмелетке толмағандарға қатысты жағдайлар қатаң түрде тоқтатылатынын мәлімдеді.