Куба президенті Мигель Диас-Канель мен Боливия президенті Луис Арсе АҚШ-тың Николас Мадуроға қатысты әрекеттерін "қабылдауға болмайтын" қадам деп бағалады, деп хабарлайды inbusiness.kz сайты Анадолы агенттігіне сілтеме жасап.

Бұл мәлімдемелер Вашингтонның Мадуроны ұстауға арналған сыйақыны 25 миллионнан 50 миллион долларға дейін арттыру шешімінен кейін жасалды.

Мигель Диас-Канель әлеуметтік желідегі жазбасында АҚШ-тың бұл әрекетін сынға алып, оның халықаралық құқық принциптеріне қайшы екенін атап өтті:

"АҚШ үкіметі тағы да өзін әлемдік төреші етіп көрсетіп, заңды президент Николас Мадуроға қарсы заңсыз әрі біржақты шараларды ақтауға тырысуда", – деді ол.

Луис Арсе де X желісіндегі жазбасында АҚШ-тың мәлімдемесін "қабылдауға болмайтын шабуыл" деп атап, былай деді:

"Демократиялық жолмен сайланған президентті ұстау үшін сыйақы жариялау – отаршылдық сарқыншағы. Бұл Венесуэланың, сондай-ақ біздің халықтардың егемендігі мен абыройына жасалған соққы".

Бұған дейін, АҚШ үкіметі Николас Мадуроны ұстауға немесе сотқа жеткізуге әкелетін ақпарат үшін берілетін сыйақыны 50 миллион долларға дейін өсіргенін мәлімдеді. АҚШ Мемлекеттік департаменті Мадуроға қатысты сыйақы туралы ақпаратты жаңартып, 2024 жылғы сайлау нәтижесін мойындамайтынын және оны Венесуэла президенті деп есептемейтінін хабарлады.