Бұл туралы Бас прокуратурада өткен ведомствоаралық кеңесте мәлім болды, деп жазады inbusiness.kz сайты.

Мемлекет басшысының тапсырмасына сәйкес елімізде есірткі қылмысына қарсы күрес шаралары күшейтілді.

Қабылданған кешенді шаралардың нәтижесінде бірқатар маңызды нәтижелерге қол жеткізілді. Атап айтқанда, биыл елімізде есірткі өткізу фактілері 16%-ға артып, 1 637 қылмыс тіркелген (2024 жылы – 1407).

Есірткімен айналысқан 14 қылмыстық топтың, оның ішінде 2 трансұлттық топтың қызметі тоқтатылды. Сонымен қатар, 14 тоннадан астам есірткі тәркіленіп, 21 астыртын зертхананың жолы кесілді.

Граффити арқылы есірткі жарнамасын тарату деректері бойынша 35 мыңнан астам жазба жойылып, 22 адам ұсталды. Қаржылық тергеу барысында 22 мың крипто әмиян анықталып, олардың ішінен 18 млн АҚШ долларына тең цифрлық активтер тәркіленді.

Сондай-ақ, есірткі қылмыстары бойынша 10 миллиард теңгеден астам мүлік мемлекет пайдасына тәркіленді.

Мысалы, Алматы облысындағы Нұра ауылында биыл мамырда жойылған астыртын зертханадан 8 тонна прекурсор мен 100 келіден астам дайын есірткі табылған. Ал Павлодарда прокурорлар энергияны шамадан тыс тұтынған пәтерді анықтап, онда "каннабис" өсірген азаматтың әрекетін тоқтатты.

Бұдан бөлек, Ішкі істер министрлігі мен Қаржылық мониторинг агенттігі арасындағы өзара іс-қимыл шеңберінде 50 ведомствоаралық жедел-тергеу тобы құрылған. Қазіргі таңда бірнеше күрделі іс арнайы прокурорлардың өндірісіне қабылданған.

Кеңес қорытындысы бойынша қылмыстық қудалау органдарына есірткі зертханаларын анықтау, ұйымдасқан қылмыстық топтарды әшкерелеу және есірткі саудасын қаржылық жолмен қолдайтын құрылымдарға қарсы терең тергеу жүргізу тапсырылды.