8 тамыз, жұма күні Жерге соңғы екі айдағы ең қуатты геомагниттік дауыл соғуы мүмкін.

Бұл туралы Ресей ғылым академиясының Күн-жер физикасы институты мен Ғарыштық зерттеулер институтының Күн астрономиясы зертханасы хабарлады, деп жазады inbusiness.kz сайты.

Ғалымдардың мәліметінше, дауылдың себебі – Күндегі M4.4 қуат деңгейіндегі жарқыл. Ол 5 тамызда тіркелген. Сол кезде Күннен шыққан плазмалық эмиссия Жерге тікелей бағытталмағаны айтылған еді. Алайда кейінгі болжамдар оның жанама соққысы біздің ғаламшарға әсер ететінін көрсетіп отыр.

Плазмалық бұлттың өзегі 8 тамыз күні таңғы сағат 7-де (Астана уақытымен сағат 9-да) Жерге жетеді деп күтілуде. Нәтижесінде, геомагниттік белсенділік көрсеткіші – Кр индексі – 6-ға дейін көтерілмек. Мұндай мән 13 маусымнан бері алғаш рет тіркелгелі отыр.

Мамандардың айтуынша, мұндай деңгейдегі дауыл орташа қуатты болып есептеледі. Дегенмен ол энергетикалық жүйелердің жұмысына, спутниктерге және радиобайланысқа әсер етуі мүмкін. Сондай-ақ полярлық шұғыла әдеттегіден төмен – 50-60 градус ендікте де көрінуі ықтимал.

Геомагниттік жағдай жұмаға қараған түні нашарлай түседі. Өйткені дәл осы кезде Жер үлкен тәждік тесік аймағына енеді. 6 тамызда Күн бетінде бір күнде 18 жарқыл болғаны тіркелді – бұл Күндегі белсенділіктің артқанын білдіреді.