Астанада болған жол-көлік оқиғасы салдарынан кішкентай қыз аяғынан айырылған еді.

Алайда апатқа себепкер болған автобус жүргізушісі қылмыстық жауапкершіліктен босатылып, рақымшылыққа ілікті, деп жазады inbusiness.kz сайты.

Полиция мәліметінше, жүргізушінің кінәсі қылмыстық іс материалдары мен сараптама қорытындысы арқылы дәлелденген. Соған қарамастан, ол "Рақымшылық жасау туралы" заң негізінде қылмыстық істі тоқтату туралы өтініш берген. Нәтижесінде іс тоқтатылғанымен, заң бойынша ол адам қылмыстық жауапкершілікке тартылған деп есептеледі.

Сонымен қатар, ведомство апатқа әкеп соққан себептерді жою мақсатында тиісті ұсынысты қалалық әкімдікке жолдағанын мәлімдеді.

Еске салайық, 2 маусым күні Астанада автобус жол жиегіндегі бағанаға соғылып, салдарынан 15 жолаушы жарақат алды. Солардың бірі – Алуа есімді бүлдіршін ауыр жарақат алып, бір аяғынан айырылды. Қалалық №1 автобус паркінің хабарлауынша, жүргізуші бағананы байқамай қалған.

17 маусымда Денсаулық сақтау вице-министрі Тимур Мұратов Алуаның ауруханадан шығарылғанын және Ақмола облысындағы тұрғылықты мекенжайы бойынша оңалту курсынан өтетінін хабарлады.