Мұны Ресей президентінің кеңесшісі Юрий Ушаков растады.
Ол АҚШ президенті Дональд Трамп пен Владимир Путиннің жақын арада жолығатынын мәлімдеген, деп жазады inbusiness.kz сайты.
Осыған дейін әлемдік БАҚ "қос елдің президенттері алдағы аптада кездесуі ықтимал" деп жазған еді.
– Америка жағының ұсынысымен алдағы күндері жоғары деңгейдегі екіжақты кездесу, яғни, президент Владимир Путин мен Дональд Трамптың кездесуі туралы келісім болды, – деді Ресей президентінің көмекшісі Юрий Ушаков.
Бұған дейін, яғни 6 тамызда Мәскеуде Путин мен Трамптың арнайы өкілі кездескенін жазған едік.
Одан соң Америка президентінің арнайы өкілі Стив Уиткофф Владимир Путинмен де үш сағаттық кездесу өткізді. Сонда қос ел президенттерінің кездесуі жөнінде айтылып, көп ұзамай жолығатыны туралы болжамды мәліметтер шықты. Мысалы, Ақ үйдегі бір дереккөзге сүйенген басылымдар "Трамп пен Путин алдағы аптада кездеседі" деп жазды.
Трамп бұған дейін "Кейінгі 5 айда 5 соғысты тоқтаттым. Алтыншысы Ресей мен Украина арасындағы соғыс болғанын қалап едім" деген болатын.
Сондықтан, Дональд Трамп "Ресей президенті Владимир Путин және Украина президенті Владимир Зеленскиймен үш жақтық кездесу өткізуге мүмкіндік туып тұр" деп есептейді.
