Бір топ жәбірленуші журналист Руслан Өтепбайдың тәуелсіз бағдарламасына сұхбат беруге мәжбүр болған.

Олардың сөзінше, Балауса Еркінқызы есімді келіншек бірнеше адамға несие алдырып, кейіннен мүлде төлемей қойған, деп хабарлайды inbusiness.kz сайты.

Балауса Еркінқызы – Шерзат Полат ісінде 7 жылға сотталған Дидар Қалиахметтің әйелі. Жәбірленушілер оған сеніп, "үстінен пайда көреміз" деген ниетпен әртүрлі банктен ірі көлемде несие рәсімдеген.

Видеода журналист Руслан Өтепбай Талғар қаласына келу себебін айтып өткен. Оның айтуынша, Дидар Қалиахметтің әйелі Балауса Еркінқызының үстінен бірнеше адам арыз жазған.

– Балауса Еркінқызына осыдан 4 ай бұрын 2 миллион теңге несие алып берген едім. Ол маған "3 ай немесе жарты жылда толық жабамын" деп айтты. Түгел жабу бұлай тұрсын, ай сайынғы төлемін де құймай отыр. Оны осы кезде өзім төлеп жатырмын. Маған "2 миллион теңге несие алып берсеңіз, 500 жүз мың теңге қосып беремін" деді. Жеңгеме беруім керек 500 мың теңге қарызым бар еді, сондықтан, "жарайды" деп келістім. Балаусадан хат-хабар жоқ, "қазір саламын, міне саламын" деп алдап жүр. Жазғаныма жауап бермейді, телефон қоңырауымды көтермейді, – дейді онымен аттас Балауса есімді Талғар тұрғыны.

Ол бұған дейін де Балауса Еркінқызына несие алып бергенін, ол кезде уақытылы төлеп бергенін жеткізді. Адамдардың сеніміне жақсы кіретінін де атап өтті.

"Мен оның Дидар Қалиахметтің әйелі екенін білмедім" дейді кейіпкер.

Оған алданғандардың бірі – Дарын есімді жас жігіт.

– Балауса Еркінқызы әлеуметтік желідегі статусына "ақшаны пайызбен қайтарамын" деген жарнама беретін. Мен бірінші рет ақша бергенде ол пайызбен қайтарды. Мен ол кезде пайызбен ақша алу заңсыз екенін білген жоқпын, кейін Балаусаның үстінен арыз түсірген кезде полиция мұның заңсыз екенін айтты, – дейді ол.

Осылайша, жас жігіт Шерзат Полат өліміне қатысты сотталған Дидар Қалиахметтің келіншегіне бас-аяғы 6-7 миллион теңге көлемінде қарыз бергенін алға тартып отыр.

Журналист Руслан Өтепбайға сұхбат берген бір топ адам бірігіп, Балауса Еркінқызының үстінен арыз жазатынын айтқан.