АҚШ-та оффшорлық жел жобаларына тыйым салынды .

АҚШ президенті Дональд Трамп мұхиттағы жел энергетикасы жобалары бойынша барлық жұмысты тоқтатуға бұйрық берді, деп жазады inbusiness.kz сайты.

Мұхит энергетикасын басқару бюросы (BOEM) Техас, Луизиана, Мэн, Нью-Йорк, Калифорния және Орегон штаттарының жағалауларында, сондай-ақ Атлант мұхитының орталық бөлігінде жел турбиналарын орнату үшін бөлінген 1,42 миллион гектар жерге қатысты шешімін кері қайтарды.

Бұл қадам Трамп әкімшілігінің елдің энергетикалық бағытын қайта қарауға кіріскенін көрсетеді.

Бұған дейін, Джо Байден президент кезінде жел энергетикасын қолдау мақсатында федералды қайраңдағы аумақтарды жалға беру жөнінде бес жылдық жоспар ұсынған болатын. Алайда Трамп билікке келгеннен кейін, оның экологиялық бастамалары біртіндеп жойылып жатыр.

Қазірдің өзінде Трамп мұнай, газ және көмір өндірісін кеңейтуге бағытталған бірнеше атқарушы бұйрыққа қол қойды. Өткен аптада Ішкі істер министрі Даг Бургум жел мен күн электр станциялары үшін жеңілдік режимінің күшін жоятындарын мәлімдеді. Сонымен қатар, құрлықтағы жел әлеуеті жоғары федералды жер телімдерін энергетика саласынан алып тастау мәселесі де қарастырылып жатыр.

Алайда қазба отынға негізделген мұндай саясат климат ғалымдары мен экологтердің қатты сынына ұшырап отыр. Сарапшылар АҚШ Энергетика министрлігін климаттың өзгеруі, жаһандық жылыну, сондай-ақ табиғи апаттар мен төтенше ауа райы құбылыстарына көз жұма қарайды деп айыптайды.

Шотландияға жасаған сапары кезінде Трамп Еуропалық комиссия төрайымы Урсула фон дер Ляйенмен өткен баспасөз конференциясында жел энергетикасын "жұмыс істемейтін алаяқтық" деп атады.