Алматы облысында суға шомылуға рұқсат етілген 120 орын бекітілді, деп хабарлайды 24KZ. Барлық жағажай қалқыма белгілермен , құтқару бекетімен және бейнебақылау камераларымен жабдықталды.

1 маусымнан бастап шомылуға болады. Оған дейін жағажайлардағы қауіпсіздікті тексеру жүргізіледі. «Сондықтан өзен-көлдерге әзір бармаған дұрыс», – дейді құтқарушылар. Жалпы облыстық төтенше жағдайлар қызметі тұрғындарға қауіпсіздік ережелерін сақтауды ескертеді. Ережені бұзғандар әкімшілік жауапкершілікке тартылады. Айыппұл мөлшері 7 айлық есептік көрсеткіш, яғни шамамен 28 мың теңге.

Ералы Разақұлов, облыстық ТЖД Азаматтық қорғаныс басқармасының бастығы:

- Адамдардың суға бату себептерінің ең бастысы – ол адамдардың ішімдік ішіп алып суға түсуі және де өз күшін асыра бағалау. Осы азаматтардың басым бөлігі суға шомылу кезінде ережелерді сақтамайды, одан кейін суық суға түсіп, алыс малтап, кесірінен осындай қайғылы жағдайлар орын алады.