Құлсары қаласында тұратын Бауыржан Хасанұлы жүзім өсіруге 6 сотық жер алған. Содан бері тәтті жемістен өнім жинауды кәсіп етеді .

Қазір оның ауласында жүзімнің бірнеше түрін беретін 20 түп өсіп тұр. Одан жыл сайы­н шамамен 2 мың көшет алады. Жеміс беретін көшетке елі­міздің әр өңірінен, 4 шетелден тапсырыс түседі.

«Алғашында Өзбекстанда өсетін жүзім түрлерін зерт­тедім. Бұл жемісті өсірудің өзіндік қиындығы бар. Оның қыр-сырына қанығып, біраз тәжірибе жинадым. Сөйтіп, 2012 жылы жүзімнің мол өнім беретін бірнеше көшетін ектім», дейді Б.Хасанұлы.

Қазір оның бақшасында Юбилей Новочеркасска, Нина, Ризамат, Зарево, Памяти Дженеева, Красава, Алвика, Велика, Маникюр фингер, Днепровский сувенир, Виктор, Ризамат ата, Надежд Азос, Памяти Нигруля, Водограй, Кодрянка, Красотка, Аватар, Находка Калугина деп аталатын жүзім түрлері өнім береді. Жүзімнің бұл түрлерінен жыл сайын шамамен 500 кило өнім жинайды. Кейін одан күнделікті дастарқанға қойылатын мейіз, шырын, жеміс қайнатпасы мен тосап дайындайды.

«Жүзімнің ерекше сорттарын шетелден арнайы алдырамын. Біздің өңірдің табиға­ты­на бейімдеймін. Басты мақса­тым – жүзім шаруашылығын ­құ­рып, ел нарығын толықтай отан­дық жүзіммен қамтамасыз ету. Экспортқа өнім шығарып, ел экономикасының өркен­деуіне де үлесімді қоссам дей­мін. Жаңа сорттар шығару үшін мемлекетпен бірлесіп ар­найы зерттеу институтын құру ­идеясын көтеріп жүрмін», дейді жүзім өсіретін жігіт.

Оның бастамасын іске асыру үшін ауқымды жер телімі қажет. Сондай-ақ ғылыми зерттеу жұмысын жүргізетін институтты жандандыруға кемінде 15–20 жыл кетуі мүмкін.

Бағбан жігіт «Бауыржан жүзімдері» брендін қалып­тастырды. Кейінгі үш жылда осы брендпен жүзім фестивалін өткізді. Аталған фестивальға мүмкіндігі шектеулі жандарды шақырып, оларға қолдау көрсетті.

Атырау облысы