Бұл туралы Төтенше жағдайлар вице-министрі Кеген Тұрсынбаев Орталық коммуникациялар қызметіндегі баспасөз мәслихатында хабарлады, деп жазады inbusiness.kz сайты.

Алматы облысындағы Сорбұлақ су қоймасы маңында жоғалған EC-145 әскери тікұшағын іздеу жұмыстары әлі де жалғасып жатыр.

– Тікұшақтың жоғалғаны туралы ақпарат түскен бойда Алматы қаласынан ТЖМ-нің екі тікұшағы іздестіру жұмыстарына тартылды. Аумағы толық шолынды, нәтижесінде тікұшаққа тиесілі болуы мүмкін бөлшектер табылды. Қазір Сорбұлақта іздестіру жалғасып жатыр. Негізгі жұмыстарды Қорғаныс министрлігі атқарып жатыр, біздің бөлімшелер де тартылған. Алдағы 1–2 күнде тікұшақты табамыз деп үміттенеміз, – деді вице-министр.

Еске сала кетейік, 25 шілдеде Қазақстан Қарулы Күштерінің Әуе қорғанысы күштеріне тиесілі EC-145 тікұшағы жоспарлы ұшу кезінде радардан жоғалып кеткен болатын.

26 шілдеде құтқарушылар тікұшақтың кейбір бөлшектерін тапты. Қазіргі таңда тікұшақ бортында болған адамдардың тағдырын анықтау мақсатында Сорбұлақ маңында тәулік бойы күшейтілген режимде ауқымды іздестіру-құтқару операциясы жүргізіліп жатыр.