Мектеп директоры мен есепші мұғалімдердің жалақысынан 71 млн теңге жымқырған .
Бұл туралы Шымкент қалалық соттың баспасөз қызметі мәлімдеді, деп хабарлайды inbusiness.kz сайты.
Соттың анықтауынша, Шымкенттегі мектеп директоры 2022 жылдың ақпан айынан 2024 жылдың тамызына дейін бас есепшісімен алдын ала келісіп, мұғалімдерге еңбекақы есептеу барысында артық сома аударып отырған.
– Бұл қаражатты есепші өз шотына және жақын туыстарының шоттарына аударып, кейін қолма-қол ақшаға айналдырып, иемденіп отырған. Мемлекетке келтірілген жалпы залал 71 миллион теңгеден асты, – делінген соттың хабарламасында.
Бұған қоса, 2022 жылы мектеп директоры өзінің оқу ісі жөніндегі орынбасары арқылы бір мұғалімді декреттік демалыстан мерзімінен бұрын шығару үшін 150 мың теңге көлемінде пара алған.
Нәтижесінде, сот үкімі бойынша директор мен есепші кінәлі деп танылып, әрқайсысы 8 жылға бас бостандығынан айырылды. Сондай-ақ оларға өмір бойына мемлекеттік қызметте және мемлекеттік мекемелерде лауазым атқаруға тыйым салынды.
Үкім заңды күшіне енген жоқ.
