Бұдан бөлек осы негізгі инертті материалдарды Ақтөбе мен Ақтаудан да алатыны айтылды.

Батыс Қазақстан облысының әкімі Нариман Төреғалиев облыста жыл сайын кем дегенде 600 шақырым жол жөнделуі қажет екенін айтып, негізгі мәселелерге тоқталды, деп хабарлайды inbusiness.kz сайты.

Өңірдегі жергілікті маңызы бар жолдардың нормативтік жағдайдағы үлесі – 56 пайыз. Бұл республика бойынша ең төменгі көрсеткіштің бірі.

"Жалпы облыс бойынша автомобиль жолдарының ұзындығы 6183 километрге тең. Оның ішінде жергілікті жолдар – 4834 км, республикалық маңызы бар жолдар – 1349 км", — деді Нариман Төреғалиев Сенатта өткен Үкімет сағатында.

Сөзінше, облыста жыл сайын кем дегенде 600 шақырым жол жөнделуі қажет.

"Қиыршық тас, битум сияқты негізгі инертті материалдарды Ақтөбе, Ақтау және Ресейден тасымалдайтынымыз сіздерге белгілі. Осыған байланысты жыл сайынғы қайталанатын проблемаларды болдырмау мақсатында бізге қажетті 40 мың тонна битумға қажеттілікті ескере отырып, біз соңғы екі жылда осы битум қоймаларын толықтай салып, бітірдік. Ендігі кезекте бізге инертті материалдардың ішінде щебень мәселесі қиындық туғызуда. Біз әлі күнге дейін Ақтөбе облысынан тасымалдаймыз", — деді облыс басшысы.