Компания ТМД және Орталық Азияның сақтандыру секторындағы ең жоғары рейтингті сақтап отыр, болжам "Тұрақты".
S&P Global агенттігі "Евразия" Сақтандыру компаниясының "ВВВ" деңгейіндегі ұзақ мерзімді кредиттік рейтингін, "Тұрақты" болжамын растады. Компания капиталдандырудың жоғары деңгейін сақтауды жалғастыруда және халықаралық қайта сақтандыру нарығында өзінің қатысуын арттырып жатыр.
"Евразия" СК рейтингі тек сақтандыру секторында ғана емес, сонымен қатар Қазақстанның егемендік рейтингінен бір саты жоғары деңгейде қалып отыр. Агенттік сондай-ақ "Евразия" СК-ның ұлттық шкала бойынша рейтингін "kzAAA" деңгейінде растады.
"Биыл "Евразия" сақтандыру компаниясы өзінің 30 жылдық мерейтойын атап өтуде және еліміздің сақтандыру секторының көшбасшысы ұстанымын сақтап отыр, мұны үнемі өсіп келе жатқан қаржылық көрсеткіштер ғана емес, халықаралық сарапшылардың тұрақты бағалаулары да айғақтайды. "Евразия" СК Қазақстандағы ірі қаржы қызметтерін экспорттаушылардың бірі және сақтандыру компаниялары арасында ең ірісі болып табылады. Өткен жылы біз Қазақстан экономикасына қайта сақтандыру сыйлықақылары түрінде $170 млн-нан астам қаржы тарттық, бұл бүкіл қаржылық экспорттың шамамен 14 пайызы", – деп "Евразия" СК басқарма төрағасы Қайрат Чегебаев агенттіктің шешіміне түсініктеме беріп өтті.
S&P агенттігінің талдаушылары "Евразия" СК-ның меншікті капиталының жеткіліктілік деңгейін тұрақты түрде жоғары бағалап, оны компанияның ең мықты жақтарының бірі ретінде атап өтуде. Мұндай стратегия компанияға сенімді сақтандыруды тек Қазақстан ішінде қамтамасыз етіп қана қоймай, ірі халықаралық клиенттерді тарта отырып, сақтандыру қызметтерін шетелге табысты экспорттауға мүмкіндік береді.
Ұлттық банктің өзекті деректері бойынша "Евразия" СК негізгі қаржылық көрсеткіштер бойынша сақтандыру нарығында көшбасшы ұстанымын сақтап отыр. Осылайша компанияның үлесіне жалпы сақтандыру компаниялары арасындағы активтердің 43,8 пайызы немесе 652 млрд теңгеден астамы тиесілі. Биыл алғашқы бес айда компания 103 млрд теңгеден астам сақтандыру сыйлықақыларын жинап, 37,6 млрд теңге көлемінде төлемдер жүргізді. Бұл – жалпы сақтандыру нарығының сәйкесінше 28 пайызы және 33 пайызы.
*26.12.2022 жылғы № 2.1.20 ҚНРДА лицензиясы
Мәтіннен қате тапсаңыз, бізге жазыңыз
