Бұл туралы ҚР Экология және табиғи ресурстар вице-министрі Мансұр Ошурбаев айтты.

Жыл сайын республика бойынша 4,5 млн тоннадан астам коммуналдық қалдық жиналады, деп жазады inbusiness.kz сайты.

− Жағдайды жақсарту үшін заманауи инфрақұрылым белсенді дамып келеді. Қалаларда қайта өңделген заттар үшін бонус төлейтін экобокстар мен фандоматтар орнатылып жатыр. Ай соңына дейін пилоттық режимде Астана мен Жезқазғанның 129 мектебінде қоқысты бөлек жинауға арналған 1000-нан астам экобокс орнатылады. Бұл шара полигонға кететін қоқыс көлемін азайтуға ықпал етеді, − деді Мансұр Ошурбаев Президент жанындағы Орталық коммуникациялар қызметінде өткен брифингте.

Қалдықтарды сұрыптау мен қайта өндеу үшін инфрақұрылым құру жұмыстары да жалғасын тапты. Қазір 63 жоба мақұлданды, бұл жыл сайынғы өңдеу қуатын 1,1 млн тоннаға арттыруға мүмкіндік береді.

Оның ішінде 14 жоба 52,4 млрд теңге қаражат алды, ал 106,9 млрд теңгеге тағы 23 жоба сараптаманың соңғы сатысында тұр. Бірқатар жоба іске асыру кезеңіне өтті, кейбірі бойынша жабдықтар орнатылып жатыр.

− Мысалы, Қостанай облысында қатты тұрмыстық қалдықтарды сұрыптау және құрылыс қалдықтарын қайта өндеу жобасы қолға алынды. Қазіргі таңда қоқыс сұрыптау кешені мен жылжымалы ұсақтағыш сатып алынды. Жоба жыл сайын 50 мың тонна тұрмыстық қалдықты және 70 мың тонна құрылыс қалдықтарын сұрыптауды көздейді, − деді вице-министр.

"Таза Қазақстан" акциясы аясында өткен жылдан бері ел бойынша 1,4 млн тонна қалдық жиналып, 2,4 млн ағаш отырғызылды. Акцияға шамамен 9 млн адам қатысқан, оның ішінде 450 мың ерікті бар.

Айта кетейік, Қарағандыда қоқыс қалдықтарынан қуат өндіретін зауыт салынады. Жоба қытайлық серіктестермен бірлесіп жүзеге асырылмақ. Негізгі шикізат көзі Қарағанды қаласынан жиналады. Ол үшін қазірден бастап пластик, қағаз, шыны сияқты қалдықтарға арналған арнайы контейнерлер орнатылды.