Бектенов "Жобалардың инновациялық навигаторы" цифрлық платформасы енгізілгенін атап өтті.

Сенат депутаттарының сауалына Премьер-Министр Олжас Бектеновтің жауабында биыл жұмыссыздардың VR-технологиялары негізінде оқытылатындығы айтылды. Бұл бастама жұмыссыз азаматтарды жаңа заман талаптарына сай біліммен қамтамасыз етіп, оларды еңбек нарығына даярлауды мақсат етеді. VR-технологиялары арқылы оқыту әдістері жұмыссыз азаматтарға инновациялық дағдыларды меңгеруге мүмкіндік беріп, олардың бәсекеге қабілеттілігін арттыруға көмектесу бағытында қолға алынып отыр.

"2025 жылы жұмыссыздарды VR-технологиялары (жұмыссыз азаматтарға практикалық дағдыларын шыңдауға мүмкіндік беретін арнайы жабдықталған кабинеттер) негізінде оқыту бойынша пилоттық жоба жоспарланған. Мансап орталықтарында (Қонаев, Өскемен, Түркістан, Астана және Шымкент қалалары) оқытуды ұйымдастыру үшін 5 VR-курсы ("Еңбек қауіпсіздігі және қорғау негіздері", "Дәнекерлеу ісінің негіздері", "Слесарлық істің негіздері", "Токарлық істің негіздері", "Кондитерлік істің негіздері") сатып алынып жатыр", – деді Үкімет басшысы жауабында.

Оқи отырыңыз: "Жәрдемақы, грант, оқу курстары". Жұмыссыздар мемлекеттен қандай көмек ала алады

Сонымен қатар ол "Жобалардың инновациялық навигаторы" цифрлық платформасы енгізілгенін атап өтті.

"Ол мемлекеттік инвестициялардың тиімділігін арттыру, инвестициялық жобаларды кешенді мониторингтеу, мердігерлер қызметін бақылау мен жұмыс орындарын құру көрсеткіштерін бағалауға арналған", – деді Олжас Бектенов.