Шығыс Қазақстанда сел жүру қаупі жоғары маусым басталды, деп хабарлайды 24kz.

Табиғаттың тосын мінезіне дайын болу үшін төтеншеліктер Қатонқарағай ауданындағы Сарымсақты шатқалында арнайы оқу-жаттығу өткізді. бұл орын кездейсоқ таңдалмаған. Өйткені дәл осы маңда, таудың ұшар басында аса қауіпті саналатын 19 мореналық көл бар. Егер бұл көлдердің бірі арнасынан асып, жарылса, тау етегіндегі ауылдарға айтарлықтай қауіп төндіреді. Жаттығу кезінде алдын ала дайындалған сценарий бойынша сел жүріп, бірнеше үй мен автожолды басып қалды. Сонымен қатар тауда демалып жүрген туристер де зардап шекті. Құтқарушылар жедел әрекет етіп, техниканы, дрондарды және қызметтік итті жұмылдыра отырып, зардап шеккендерге көмек көрсетті. Мамандардың айтуынша, сел мен көшкіндердің жиілеуі климаттың өзгеруімен тікелей байланысты. Осыған орай қауіпті аймақтарда күн сайын гидрометеорологиялық мониторинг жүргізілуде.

Телғат Нұрахмет, «Қазселденқорғау» ММ ШҚО Аймақтық пайдалану басқармасы басшысының м.а.:

- Сел қаупі қатты жауын жауғанда не нөсер жауын жауғанда немесе үлкен жер сілкінісінде мореналық көлдер ашылып, сол жүруі ықтиымал. Осы Сарымсақтыда бізде гидробекет орналасқан және төрт, үш маусымдық гидробекеттер ашылды.