Түркістан облысында судағы қауіпсіздікті арттыру бағытындағы жұмыстар жүйелі түрде жалғасуда. Былтыр өңірде 43 арнайы шомылу орны жұмыс істесе, 2026 жылы олардың санын 53-ке дейін көбейту жоспарланып отыр. Бұл орындарда құтқару бекеттері, медициналық пункттер мен қоғамдық қауіпсіздік қызметтері тұрақты жұмыс істейтін болады.

Бұл туралы өткен баспасөз мәслихатында облыстық төтенше жағдайлар департаментінің өкілі Дәурен Жүсіпов мәлімдеді. Оның айтуынша, шомылу орындары жеткіліксіз елді мекендерде биыл 376 каркасты-модульді бассейн орнату көзделген. Бұл – әсіресе балалар мен тұрғындардың қауіпсіздігін қамтамасыз етудегі маңызды қадамдардың бірі.

Сонымен қатар, қауіпсіздік талаптарын бұзу деректеріне қатысты нақты шаралар қабылдануда. 2025 жылы судағы қауіпсіздік ережелерін сақтамағаны үшін 151 жеке тұлғаға 2 078 062 теңге көлемінде, ал 6 кәсіпкерлік нысанына 235 920 теңге айыппұл салынған.

Статистикалық мәліметтерге сәйкес, өткен жылы судағы түрлі оқиғалар салдарынан 55 адам көз жұмған. Өкінішке қарай, олардың 25-і – балалар. Қайғылы жағдайлардың басым бөлігі, яғни 82%-ы каналдар мен арықтарда тіркелген. Бұл облыс аумағында су арналарының көптігімен тікелей байланысты. Жалпы, өңірде ұзындығы 15 мың шақырымнан асатын 3 мыңнан астам суару каналдары бар және олардың едәуір бөлігі елді мекендердің ішінен өтеді.

Осы қауіптердің алдын алу мақсатында 2026 жылы 135 шақырым канал бойына қоршаулар орнату, 1750 тыйым салу белгілерін орналастыру және 101 бейнебақылау камерасын іске қосу жоспарланған. Бұл шаралар тұрғындардың, әсіресе балалардың қауіпсіздігін қамтамасыз етуге бағытталған.

Бұдан бөлек, балаларды жүзуге үйрету және судағы қауіпсіздік мәдениетін қалыптастыру мақсатында коммуналдық және жеке бассейндермен арнайы меморандумдар жасалмақ. Соның аясында әлеуметтік осал топтағы балаларды аптасына екі рет тегін шомылдыру қарастырылған.

Жалпы алғанда, атқарылып жатқан бұл кешенді шаралар судағы жазатайым оқиғалардың санын азайтуға және тұрғындардың қауіпсіздігін арттыруға бағытталған маңызды қадам болып табылады.