Әнші әрі актриса Меруерт Түсіпбаева атыраулық блогер Заиданың мәлімдемесіне жауап беріп, әлеуметтік желіде тараған ақпаратты шындыққа жанаспайды деп мәлімдеді, деп хабарлайды Sn.kz ақпарат порталы.

Өнер иесінің айтуынша, блогер айтқан айыптаулар негізсіз. Ол өзіне қатысты ешқандай құқық қорғау органдарынан хабар болмағанын айтып, нақты дәлелдер келтіруді талап етті.

«Жалған ақпарат таратудың салдары ауыр болады. Қалған мәселемен адвокаттар айналысады. Алматы полициясы хабарласты деген сөздің өзі күмәнді – нақты кім, қай орган екені белгісіз. Қазіргі кезде ешбір құзырлы орган мұндай жолмен жұмыс істемейді. Егер айтқандары рас болса, дәлелдесін», – деді әнші.

Сондай-ақ Түсіпбаева блогерді әдейі жала жапты деп айыптап, заңгерлері барлық жарияланған пікірлерді тіркеп жатқанын жеткізді. Оның сөзінше, бұл жағдай сотқа дейін жетуі мүмкін.

Айта кетейік, бұған дейін атыраулық блогер Заида өзінің парақшасында үстінен арыз түскенін хабарлаған. Ол Алматыдан хабарласқан полиция қызметкері шағымның Меруерт Түсіпбаева тарапынан жазылғанын айтқанын жеткізген.