Қазақстан мен Түркия арасында тағы бір әуе байланысы орнатылды.

Енді елордадан Аланияға тікелей ұшуға болады. Астанадан басталған алғашқы рейс Түркияның танымал жағалауына төрт сағатта жетті. 175 жолаушы мінген отандық әуе кемесі Түркияның Газипаша халықаралық әуежайына қонды. Жаңа рейсті қарсы алу рәсімі ерекше өтті.

Ұшаққа екі жақтан су шашып, жолаушыларға ұлттық нақыштағы сыйлықтар ұсынылды. Сондай-ақ шашу шашылып, ыстық бауырсақ таратылды. Мұндай ілтипат жолаушыларды ерекше әсерге бөледі. Айта кеткен жөн, бұл бағыт бойынша жаз мезгілінде ғана ұшады. Дегенмен, жолаушылар тарапынан сұраныс артса, әуе рейсі жыл бойы жұмыс істеуі мүмкін.