Түркияның Мерсин аймағында салынып жатқан алғашқы атом электр станциясын іске қосу мерзімі келесі жылға шегерілді. «Аккую» атом электр станциясының бірінші реакторын пайдалануға беру осымен үшінші рет кейінге қалып отыр.

Нысанның құрылысын Ресейдің «Росатом» компаниясы жүргізіп жатыр. Келісімге сай, оның алғашқы энергоблогы 2023 жылы қолданысқа берілуі тиіс еді. Алайда технологиялық жабдықтарды жеткізудегі кідірістерге байланысты әуелі 2025 жылға, кейін тағы ауыстырылды. Жоспар бойынша «Аккую» атом электр станциясының төрт реакторы 2028 жылға қарай толық іске қосылу керек.

Антон Дедусенко, «Аккую Нуклеер» компаниясының басқарма төрағасы:

- Бірінші энергоблок пайдалануға берілгеннен кейін қалған барлық блоктарға қызмет көрсетеді. Қазір біз осы кешеннің келесі жылы электр желісіне қуат беруге толық дайын болуы үшін күш салып жатырмыз. Іске қосу жұмыстары жалғасып жатыр.