Таразда ескі көпқабатты үйлер жаңа кейіпке еніп жатыр.

Биыл қалалық әкімдік орталықтағы үйлерді бюджет қаржысына жөндеп шықты. Шатырларын ауыстырып, сыртын заманауи үлгіде қаптады. Жалпы шаһарда былтырдан бері 27 үй жаңғыртудан өтті.

Абай және Қазыбек би көшесіндегі мына үйлер өткен ғасырдың 70-жылдары салынған. Қазір адам танымастай өзгерді. 15 үйді жаңғыртуға 2,5 млрд теңге жұмсалды. Келер жылы аулаларда абаттандыру жұмыстары басталады.

Нұрсұлтан Исабеков, қала әкімінің орынбасары:

- 15 үйдің сыртқы келбеті қалпына келтірілді. Түнгі жарығымен заманауи талаптарға сәйкес. Материалдарының барлығы отандық өнім біріншіден. Екіншіден түнгі жарықтары бастапқы жобада қарастырылған балкондар.

Келер жылы Ыбырайым Сүлейменов көшесіндегі 14 үй жаңғыртылады. Бұған бюджеттен 2,4 млрд теңге бөлу жоспарланған.

Қуаныш Шайымқұлов, қала тұрғыны:

- Жарық шамдары әдемі болып тұр. Қазір қалада біздің сырттан келген қонақтарды осындай жерге алып келіп қыдырту ол бір мақтаныш, қаламыздың осылай көркейіп жатқаны.

Дилора Қалмахамбетова, қала тұрғыны:

- Адамдар түнде қорықпайды жүреді. Бізге сондай жанға жайлы, жақсы болып жатыр.

Сонымен қатар әуежай және Айша бибі көшесінің арасына саябақ салынады. Этноауыл бой көтеріп, Төрткүл керуен сарайы мен гидросаябақ кешені қайта жаңғыртылады.

Авторлары: Мерей Бает, Бақытжан Бапаев, Елдар Байділдә