«Qarmet» компаниясы атом электр станциясының құрылысына арналған өнім шығарады. Осы бағытта кәсіпорын болаттың жоғары сапалы жаңа маркаларын әзірлеуді бастады.

Бұл туралы Мемлекет басшысының қабылдауында болған «Qarmet» директорлар кеңесінің төрағасы Андрей Лаврентьев мәлімдеді. Оның айтуынша, өндіріс сапасына серпін беретін тоғыз ірі инвестициялық жоба әзірленген. Бұл бастама елдегі болат өндірісін жүйелеп, металл прокаты импортын төмендетеді. Кәсіпорынның негізгі көрсеткіштері де көңіл көншітеді. Екі жылда болат өндірісі 22 пайыз, көмір концентраты 26 пайыз артқан. Ал темір кені 32 пайызға көбейді.

«Qarmet» жанынан ірі металлургиялық кластер құрылып жатқаны айтылды. Бұл шағын және орта кәсіпорындардың шикізатты терең өңдеумен айналысуына мүмкіндік береді. Одан бөлек, компания мен кәсіподақтар арасында жаңа ұжымдық келісімшарт жасалды. Құжат 35 мың еңбеккерге әлеуметтік кепілдік беруді қарастырады. Кездесу соңында Қасым-Жомарт Тоқаев атқарылған жұмысқа оң бағасын беріп, даму жоспарына қолдау білдірді.