«Қайрат» «Олимпиакосқа» есе жіберді. Алматылық клуб чемпиондар лигасының 6-шы турында кезекті рет жеңіліп, грекиялық командадан ұтылып қалды.

Қақпашы Темірлан Анарбеков «Қайрат» пен «Олимпиакос» арасындағы матчтың ең үздік ойыншысы атанды. Ол 90 минутта сегіз сейв жасап, қақпасын бірнеше голдан аман сақтап қалды. Десе де ойынның 73-ші минутында Жерсон Мартинш есепті ашып, бір гол соғып кетті. Дәл қазір турнирлік кестеде үш ұпай еншілеген «Олимпиакос» 26-шы орынға көтерілсе, «Қайрат» 35-ші орында тұр. Енді 20 қаңтарда Астана Арена стадионында бельгиялық Брюгге клубын қабылдаса, 29 қаңтарда лондондық зеңбірекшілер яғни Арсеналға қонаққа барады.

«Қайрат» жастары жеңіске жетті

Ал «Қайрат» жастар құрамасы «Олимпиакосты» айқын басымдықпен ұтты. Яғни 19 жасқа дейінгі ойыншылар жалпы кезеңдегі алғашқы толық үш ұпайын еншілеп, жарысты төрт ұпаймен қорытындылады. Алматылық клуб сапынан матчтың 4-ші минутында Рамазан Бағдат есеп ашса, 57-ші минутта Мұхамедәлі Әбіш екінші голды соқты. Бұған дейін команда «Спортинг», «Реал Мадрид», «Пафос» және «Интер» жастарынан жеңіліп, «Копенгагенмен» тең тарқасқан еді.

Күн райы боксшыларға кедергі емес

Бокстан әлем чемпионатының қатысушылары 25 градус ауа температурасында жұдырықтасады. Бұл спортшыларға кедергі емес. «Яғни ашық аспан астында барлығына бірдей жағдай жасалған», — дейді сарапшы. Жекпе-жектер кешкісін яғни ыстықтың беті қайтқаннан кейін басталады.

Жандос Айтбайұлы, сарапшы:

- Дубайда ауа райы бірқалыпты. Күндіз ыстық болғанымен кешке қарай ыстықтың беті қайтып, теңізден самал жел соғады. Барлық қатысушыларға мүмкіндік бірдей. Ашық аспан астындағы жұдырықтасу жайлы біз бапкерлерден, боксшылардан сұрадық. Басында алғаш шыққанда біраз үйренбегеннен кейін қиындау болған. Қазір уақыт өте келе бәрі дұрыс деп жатты. Тіпті кейбір боксшылар еш айырмашылық байқамағандарын да айтты. Сондықтан ашық аспан астындағы әлем чемпионаты ешкімге кедергі келтіріп жатқан жоқ.

Сондай-ақ сарапшы жарыс орташа төмен деңгейде өтіп жатқанын жасырмады. Себебі ширек финалға дейінгі кездесулерде біраз дау-дамай болған. Яғни спортшылар мен бапкерлер төрешілердің шешімімен келіспей, наразылықтарын білдірген. Мәселен ресейлік спортшыны ойсырата ұтып, нокдаунға түсірген отандасымыз Ерасыл Жақпековтің жеңісі бағаланбаған еді.

Жандос Айтбайұлы, сарапшы:

- Бапкерлерден сұрадық. Егер есеп 3-2 болғанда бізге шағым түсіруге болатын еді. 4-1 есебімен ұтылды. «Сондықтан ешқандай мүмкіндік қалған жоқ», — деді. Енді пікір екіге жарылды. Біреулер «жеңді» дейді, екіншілері «жеңілді» дейді. Жақпеков ұтылмаған сияқты еді. Алғашқы раундта қарсыласына есе жіберегінме қалған 2 раундта басым түскен еді. Алайда төрешілер шешімі сондай. Ол өзгермейді.