Қазақстан Біріккен ұлттар ұйымы Қауіпсіздік rеңесінің құрамын кеңейтіп, оған әлемнің әр өңірінен өкіл қосу туралы ұстанымды қолдайды .

Ұйым қазіргі заман талаптарына сай болуы үшін Қауіпсіздік кеңесіне құрылымдық реформа жасалуы тиіс.

Мемлекет басшысы Қасым-Жомарт Тоқаев Астана халықаралық форумының пленарлық отырысында осындай мәлімдеме жасады. Президенттің сөзінше, алпауыт елдер бейбітшілік пен қауіпсіздікті сақтауға бейіл екенін анық білдіруі керек. Бұл ретте Біріккен ұлттар ұйымының Жарғысын мүлтіксіз сақтау аса маңызды. Президент мемлекеттер арасындағы ынтымақтастық байланыстарды нығайту мақсатында Астана халықаралық форумының құрылғанын да тілге тиек етті. Бұл алаң өзара құрметке негізделген ашық пікірталас мүмкіндігін ұсынып, күрмеулі мәселелердің шешімін бірлесе табуға жол ашпақ.

Қасым-Жомарт Тоқаев, Қазақстан Республикасының Президенті:

Биылғы форум тақырыбы – «Ақыл-ой қосу арқылы келешекті бағдарлау» (Connecting Minds, Shaping the Future). Бұл – біздің үндеуіміз әрі қалтқысыз сеніміміз. Жаһандық сын-қатерді жалғыз еңсеру мүмкін емес. Дипломатия ресми протоколдың тар шеңберінен шығып, анағұрлым терең әрі адами қалыптағы қарым-қатынасқа төр ұсынуға тиіс. Біз дүниежүзілік дамудың жаңа кезеңіне қадам бастық. Мұнда адамдар арасындағы сенім, білім-тәжірибемен бөлісу және азаматтық қоғамның ынтымақтастығы халықаралық қатынастардың жаңа іргетасын қалайды. Сондықтан ықпалдастықтың аясын кеңейте беруіміз керек. Бұл форум тың ойлар айтылатын ғана емес, батыл қадамдар жасалатын алаңға айналсын.