2025 жылы KAZ Minerals Тобы талантты жастарды қолдау бағдарламасын дамыту жолында маңызды қадам жасады. Енді еліміздің барлық аймағындағы кәсіпорын қызметкерлерінің балалары білім грантына үміткер бола алады, деп хабарлайды NUR.KZ.

Ағымдағы жылы Ақтоғай мен Бозшакөлдегі кәсіпорындар оқу ақысын, қажет болған жағдайда жатын орынның шығынын, және айлық стипендияны толық қамтамасыз ететін 38 грант бөлді. Колледж студенттеріне айына 45 000, ЖОО студенттері үшін 55 000 теңге шәкіртақы төленеді (бір жылдың 10 айында).Бағдарлама еліміздегі Қ. Сәтбаев атындағы ҚазҰТЗУ, Д. Серікбаев атындағы Шығыс Қазақстан техникалық университеті, Торайғыров университеті, Ә.Сағынов атындағы Қарағанды техникалық университеті, Геологиялық барлау және Электротехникалық колледждер, Павлодар химия-механикалық колледжі секілді еліміздегі жетекші жоғары оқу орындары мен колледждерде тау-кен өнеркәсібі үшін мамандарды дайындауға бағытталған. Үстіміздегі жылы 13 грант иесі анықталды. Солардың бесеуіне өндіріске қажет инженерлік және техникалық мамандықтарды таңдаған кәсіпорын қызметкерлерінің балалары ие болды.Грант иелерінің бірі – Семей геологиялық барлау колледжінің екінші курс студенті Ербол Дәрібаев. Ол "Табиғи ресурстарды қорғау және тиімді пайдалану" мамандығы бойынша білім алуда. Ерболдың әкесі Әділбек Дәрібаев 2013 жылдан KAZ Minerals Aktogay сульфидті фабрикасында жөндеуші-слесарь болып жұмыс істейді. Ол ұлына компания қызметкерлерінің балаларына арналған грант бағдарламасы бойынша бағын сынап көруге кеңес берген.

"Экология мамандарынсыз заманауи кәсіпорынды көз алдында елестету қиын. Бұл – ғылым мен нақты пайданы үйлестіретін мамандық. Ауаның, судың, жердің тазалығы соған тәуелді. Бұл жай ғана жұмыс емес, бұл – табиғат пен адамдар алдындағы жауапкершілік. Сол себепті мен экологияны таңдадым", — дейді Ербол.Ұрпақтар сабақтастығын Бозшакөлде жұмыс істейтін Медяниктер мен Фатхиевтер отбасынан байқауға болады. Александр Медяник кәсіпорында 11 жыл – тау-кен кешені іске қосылған алғашқы күннен жұмыс істейді. Ол бұрғылау және жарылыс ісінің шебері, ал оның ұлы Антон "Тау-кен инженериясы" мамандығына оқуға түсті."Бозшакөлге он жылдан аса уақыт бұрын, кәсіпорын енді қарқын ала бастаған кезде жұмысқа тұрдым. Әрбір жарылыс, әрбір ауысым – ұжымның үйлесімді жұмысының нәтижесі", — дейді Александр.

Антон әкесін үлгі тұтып, тау-кен өндірісіндегі жаңа технологияларды игеру арқылы саланың дамуына өз үлесін қосуға шешім қабылдайды."Мен әкемнің жұмысын көріп өстім. Оның мамандығы мен үшін әрқашан маңызды, әрі қызық көрінетін. Одан бөлек, мұнда жетістікке жеткің келсе компания міндетті түрде қолдау көрсетеді", — дейді Антон Медяник.Бозшакөлде жұмыс істейтін тағы бір маман Руслан Фатхиев – құрал-жабдықтарды жөндеу және күтіп-баптау слесарі. Өндірістегі тұрақтылық пен механизмдердің сенімділігі Русланның жұмысына байланысты. Ол машинаның шағын бұрандасынан қозғалтқышына дейін жатқа біледі. Оның ұлы Әмір транспорт пен заманауи технология саласындағы инженерлік бағытты таңдаған. Руслан ұлының таңдауына риза және техникалық мамандықтың сенімді болашақ кепілі екеніне сенеді.

Бұл бірнеше мысал ғана. 2018 жылдан бері 159 студент компания қолдауына ие болды, және олар өз нәтижелерін бере бастады.Оқуды аяқтағаннан кейін грант иелерінің барлығы компанияда ақысы төленетін тәжірибеден өтеді. Бұл олардың жұмыс тәртібіне бейімделіп, кәсіби дамуына көмектеседі. Тәжірибе мерзімі аяқталғаннан кейін жас мамандар тұрақты қызметке ауыстырылады.Сонымен қатар KAZ Minerals қазіргі қызметкерлерінің оқуына да үнемі инвестиция салып отырады. Кәсіпорындарда симуляторлар мен VR-құрылғылар орнатылған оқыту орталықтары жұмыс істейді. Одан бөлек кәсіби біліктілікті арттыру мен дамуды қамтамасыз ететін оқыту бағдарламалары мен тренингтер үздіксіз қолданысқа енгізілуде.

Мәтіннен қате тапсаңыз, бізге жазыңыз