Қазақстан Президенті Қасым-Жомарт Тоқаев Германия Бундесратының президенті Анке Релингермен кездесу өткізді, — деп хабарлайды Massaget.kz тілшісі Ақордаға сілтеме жасап.

Мемлекет басшысы Германияның Қазақстан үшін Еуропалық одақтағы негізгі стратегиялық серіктестердің бірі екенін және еліміздің экономикасына жетекші инвесторлардың қатарында екенін атап өтті.

"Германия – Еуропадағы негізгі серіктесіміз, біз бұл елмен ынтымақтастықты дамытуға айрықша мән береміз. Осы мүмкіндікті пайдаланып, Германияға жасаған сапарым жайлы жылы естеліктермен бөліскім келеді. Президент Штайнмайермен кездестім, оны бұрыннан жақсы білемін. Парламентаралық ынтымақтастыққа келсек, мен бұл бағыттағы байланысты толық қолдаймын", – деді Қасым-Жомарт Тоқаев.

Президент жоғары мәртебелі қонаққа еліміздің экономикалық саясатындағы негізгі басымдықтарды таныстырды.

"Қазір біз ірі инфрақұрылымдық жобаларды іске асыру мен дамытуды, цифрландыру мен жасанды интеллектті енгізуді маңызды деп санаймыз. Сонымен қатар көлік-логистика және, әрине, ауыл шаруашылығына баса назар аудару қажет", – деді Тоқаев.

Оның айтуынша, соңғы жылдары Қазақстанда ауқымды саяси реформалар жүзеге асырылды.

"Конституцияға енгізілген өзгерістер мен жалпы заңнамадағы түзетулер Қазақстанның түбегейлі өзгеріп жатқанын көрсетеді. Әрине, реформалар жалғасады. Алдағы жаңалықтар, шамасы, құқық қорғау және сот жүйесін қамтитын болады. Бұл – өте маңызды. Алайда, жалпы алғанда, мемлекеттің сипаты, яғни президенттік басқару жүйесі сақталады. Өйткені бұл – өзгермелі әлем жағдайында еліміз қандай болуы керек деген түсінігімізге толық сәйкес келеді", – деді Мемлекет басшысы.

Анке Релингер Қасым-Жомарт Тоқаевқа кездесуге уақыт бөлгені үшін алғыс айтып, екі елдің ортақ мүдделерін ілгерілетуге дайын екенін білдірді.

"Идеялар мен ойлармен бөлісу үшін уақыт бөлгеніңізге рақмет. Сіздің сәлеміңізді Федералды Президент Штайнмайерге жеткіземін. Ол – Қазақстан мен Орталық Азияның үлкен досы. Қазақстан – орташа державалар қатарында біздің өңірлік негізгі және сенімді серіктесіміз", – деді Германия Бундесратының президенті.

Кездесу барысында Қазақстан мен Германия арасындағы сауда-экономикалық, инвестициялық және мәдени-гуманитарлық ынтымақтастықты нығайтудың нақты аспектілері талқыланды.

Анықтама: Бундесрат (нём. Bundesrat – "Федералдық кеңес") – Германия жерлерінің мүддесін білдіретін федералдық орган. Ол Федералды президент, Бундестаг, федералдық үкімет, Жоғарғы федералдық сот және Федералдық конституциялық сотпен қатар қызмет етеді.

Бұған дейін Мемлекет басшысы Қасым-Жомарт Тоқаев Руанда Президенті Поль Кагамемен де кеңейтілген форматтағы кездесу өткізген болатын. Тараптар сауда, инвестиция, көлік, ауыл шаруашылығы, ақпараттық технологиялар, электронды үкімет және қаржы салаларындағы ынтымақтастықтың басым бағыттарын айқындады.

Instagram парақшамызға жазылып, ең қызықты ақпараттарды бірінші болып оқыңыз!