Қытайлық электрлі көлік өндіретін XPENG компаниясы «ұшатын автомобильдерін» сынақтан өткізуді бастады. «Ұшатын көлік» алты дөңгелекті жерүсті көлігінен және тік ұшып-қона алатын, ұшуды қамтамасыз ететін құрылғысы алуға ыңғайлы аппараттан тұрады, деп жазады Egemen.kz Синьхуа агенттігіне сілтеме жасап.

Айрықша көліктер Қытайдың Гуанчжоу қаласында өндіріліп жатыр. Ауданы 120 мың шаршы метрлік зауыттың өндірістік қуаты жылына 10 000 авиациялық модульді құрайды. Бұл көрсеткіш – осы саладағы әлемдік зауыттардың ішіндегі ең ірісі.

Кәсіпорын толық қуатында іске кіріскенде әр 30 минут сайын бір ұшу аппаратын жинауды көздеп отыр.

XPENG AEROHT компаниясы өнімін таныстырғаннан кейін шамамен 5 000 «ұшатын көлікке» тапсырыс алып үлгерген. Ал «ұшатын көліктер» тапсырыс берушінің қолына 2026 жылы жеткізілмек.

Ұшып-қонатын электрлі ұшу аппараты автоматты және механикалық басқару режимдерінде ұсынылады. Автоматты режим интеллектуалды маршрут құруға, сондай-ақ бір батырманы басу арқылы ұшып-қонуға мүмкіндік береді. Жерүсті көлігінің ұзындығы шамамен 5,5 метр болады.